ସଂସ୍କାର :-ପୁଣି ଏକ ନୂଆ ରୂପରେ ଆସୁଛି ଜାତୀୟ ମନରୋଞ୍ଜନ ଟେଲିଭିଜନ୍ ଚ୍ୟାନେଲ ସୋନି ଟିଭିରେ ପ୍ରସିଦ୍ଧ ରିଆଲିଟି ଶୋ ‘ଦି କପିଲ ଶର୍ମା ଶୋ’ । ଏହି ଶୋ’ ଶୀଘ୍ର ଟିଭି ପରଦାକୁ ଫେରୁଛି ବୋଲି କପିଲ ଶର୍ମା ସ୍ୱୟଂ ନିଜ ଇନଷ୍ଟାଗ୍ରାମରେ ଏହି ସୂଚନା ଦେଇଛନ୍ତି। ଏହାର ଅର୍ଥ ଆପଣ ନିଜ ପରିବାର ସହିତ ପୁଣି ଥରେ ଟିଭି ଆଗରେ ହସିବା ପାଇଁ ପ୍ରସ୍ତୁତ ହୁଅନ୍ତୁ।
ତେବେ କପିଲ ଶର୍ମା ନିକଟରେ ଇନଷ୍ଟାଗ୍ରାମରେ କିଛି ଫଟୋ ସେୟାର କରିଛନ୍ତି। ଏହି ଫଟୋଗୁଡ଼ିକରେ କପିଲ ଶର୍ମା ନିଜ ଶୋ’ ର ପୁରୁଣା ଷ୍ଟାରକାଷ୍ଟଙ୍କ ସହ ପୋଜ୍ ଦେଉଥିବାର ଦେଖିବାକୁ ମିଳିଛି। ଏହି ଫୋଟଗୁଡ଼ିକୁ ସେୟାର କରି କପିଲ ଶର୍ମା କ୍ୟାପସନ୍ ଲେଖିଛନ୍ତି ” ପୁଣି ପୁରୁଣା ଚେହେରା ସହିତ ନୂଆ ଆରମ୍ଭ” | ଏହି ଫଟୋରେ କପିଲ ଶର୍ମାଙ୍କ ସହିତ କିକୁ ଶାରଦା, ଭାରତୀ ସିଂ, କୃଷ୍ଣ ଅଭିଷେକ, ଚନ୍ଦନ ପ୍ରଭାକର ଏବଂ ସୁଦେଶ ଲାହିରି ନଜର ଆସିଛନ୍ତି।
ନୂତନ ସିଜନ୍ ବିଷୟରେ ହୋଷ୍ଟ କପିଲ ଶର୍ମା କହିଛନ୍ତି ଯେ, ସେ ବର୍ତ୍ତମାନ ଲେଖକ ଏବଂ ନୂତନ ଅଭିନେତା ଖୋଜୁଛନ୍ତି। ତେବେ ଏଠାରେ ଆମେ ଆପଣଙ୍କୁ ମନେପକାଇ ଦେବାକୁ ଚାହିଁବୁ ଯେ, ଗତ ଫେବୃଆରୀରେ କପିଲ ଶର୍ମା ପୁଣି ଥରେ ପିତା ହୋଇଛନ୍ତି। କୁହାଯାଉଥିଲା ଯେ କପିଲ କେବଳ ତାଙ୍କ ପତ୍ନୀ ଜିନିଙ୍କୁ ସମୟ ଦେବା ପାଇଁ କାମରୁ ବିରତି ନେଇଥିଲେ। ଅନ୍ୟପଟେ ସେହି ସମୟ ମଧ୍ୟରେ, କୋଭିଡ କାରଣରୁ ଅନେକ ଅତିଥି ଶୋ’କୁ ଆସିପାରିନଥିଲେ, ଯେଉଁ କାରଣରୁ ଶୋ’ ର ନିର୍ମାତାମାନେ କିଛି ସମୟ ପାଇଁ ଏହାକୁ ବନ୍ଦ କରିବାକୁ ନିଷ୍ପତ୍ତି ନେଇଥିଲେ |
