କରୋନା ମହାମାରୀ ବଦଳାଇ ଦେଉଛି ପରିଚୟ । କେଉଁଠି କିଏ ଅବସାଦରେ ଜୀବନରୁ ହାରିଗଲାଣି ତ କିଏ ସୃଜନାତ୍ମକ ତଥା ଉତ୍ସାହମୂଳକ କାର୍ଯ୍ୟ କରି ଲୋକଙ୍କ ହୃଦୟରେ ଘର କଲାଣି । ଖିଲାଡ଼ି ଅକ୍ଷୟ କୁମାର ଓ ରିୟଲ ଲାଇଫ ହିରୋ ସାଜିଥିବା ସୋନୁ ସୁଦ୍ ବର୍ତ୍ତମାନ ସୋସିଆଲ ମିଡ଼ିଆ ପ୍ଲାଟଫର୍ମ ଟ୍ୱିଟରରେ ଟ୍ରେଣ୍ଡ ହେଉଛନ୍ତି । ହିନ୍ଦୀ ସିନେ ଜଗତର ଦୁଇ ତାରକା ଏବେ ଏ ଦୌଡ଼ରେ ସାମିଲ୍ ହେଇ ଦେଶବାସୀଙ୍କ ହୃଦୟରେ ସ୍ଵତନ୍ତ୍ର ସ୍ଥାନ କରିବାରେ ସକ୍ଷମ ହୋଇଛନ୍ତି । ଫଳସ୍ଵରୂପ ସମାଜ ପ୍ରତି ସେମାନଙ୍କ ସହଯୋଗର ହାତ ଓ ସହୃଦୟତା ପାଇଁ ଉଭୟଙ୍କୁ ସମ୍ମାନିତ କରିବାକୁ ଦାବି ହେଉଛି ସୋସିଆଲ ମିଡ଼ିଆରେ ।
ଲକଡାଉନ ସମୟରେ ଲୋକମାନଙ୍କୁ ସାହାଯ୍ୟ କରିବାକୁ ଆଗେଇ ଆସିଥିବା ଏହି ଦୁଇ ବଲିଉଡ୍ ରିଲ୍ ଷ୍ଟାର୍ ଏବେ ଷ୍ଟାର୍ ହେଇଯାଇଛନ୍ତି ରିୟଲ୍ ଲାଇଫରେ । ସୂଚନା ଅନୁଯାୟୀ ସୋସିଆଲ ମିଡ଼ିଆ ୟୁଜର୍ସ ତଥା ପ୍ରଶଂସକମାନେ ଏହି ଦୁଇଜଣଙ୍କୁ ଦେଶର ସର୍ବୋଚ୍ଚ ନାଗରିକ ସମ୍ମାନ “ଭାରତ ରତ୍ନ” ସମ୍ମାନରେ ସମ୍ମାନିତ କରାଯାଉ ବୋଲି ଦାବି କରିଛନ୍ତି ।
ଜଣେ ୟୁଜର୍ ତ ଦାନ କରିଥିବା ତାଲିକା ଦେଇ କହିଛନ୍ତି ଯେ ଅକ୍ଷୟ କୁମାର ଓ ସୋନୁ ସୁଦ ସଙ୍କଟ ସମୟରେ ମନ ଖୋଲି ଲୋକଙ୍କୁ ସାହାଯ୍ୟ କରିଛନ୍ତି ଯେଉଁଥି ପାଇଁ ଏମାନଙ୍କୁ ଭାରତ ରତ୍ନ ଦିଆଯିବ ଉଚିତ୍ । ଆଉ ଜଣେ ୟୁଜର୍ ମଧ୍ୟ ଲେଖିଛନ୍ତି ଯେ ଉଭୟ ଅଭିନେତା ରିୟଲ୍ ଲାଇଫରେ ବହୁତ ଭଲ କାମ କରିଛନ୍ତି, ତେଣୁ ଏମାନେ ଭାରତ ରତ୍ନ ପାଇବା ଯୋଗ୍ୟ । ଏମିତିକି ବଲିଉଡ ଅଭିନେତ୍ରୀ କଙ୍ଗନା ରାନ୍ଵତ ମଧ୍ୟ ଏ ଦାବି କରିଛନ୍ତି ।
ସୋନୁ ସୁଦ୍ ଅନ୍ୟ ରାଜ୍ୟରେ ଫସି ରହିଥିବା ହଜାର ହଜାର ଲୋକଙ୍କୁ ଆର୍ଥିକ ସାହାଯ୍ୟ କରିବା ସହିତ ପ୍ରବାସୀ ଶ୍ରମିକମାନଙ୍କୁ ନିଜ ଭିଟ୍ଟାମାଟିକୁ ଫେରିବା ପାଇଁ ସହାୟକ ହୋଇଛନ୍ତି । ଫଳରେ ଲୋକେ ତାଙ୍କୁ ଭଗବାନଙ୍କ ଭଳି ସମ୍ମାନ କରୁଛନ୍ତି । ଅନ୍ୟପକ୍ଷରେ ଅକ୍ଷୟ କୁମାରଙ୍କୁ ରିୟଲ୍ ଲାଇଫ ହିରୋର ମାନ୍ୟତା ଦେଇ ଦୁଇ ଜଣଙ୍କୁ ଅସଲି ଦେଶଭକ୍ତ ବୋଲି ଲୋକେ କହୁଛନ୍ତି ଯଦିଓ ଏଭଳି ଟ୍ୱିଟକୁ ନେଇ ଅକ୍ଷୟ କୁମାର କିମ୍ବା ସୋନୁ ସୁଦ ଏ ପର୍ଯ୍ୟନ୍ତ କୌଣସି ପ୍ରତିକ୍ରିୟା ଦେଇନାହାନ୍ତି ।
