ସଂସ୍କାର : ମହିଳା ଡାକ୍ତରାଣୀ କଲେ ଆତ୍ମହତ୍ୟା। ନିଜର ନିର୍ଦ୍ଦୋଷତା ପ୍ରମାଣ କରିବା ପାଇଁ ନିଜକୁ ଘରର ଫ୍ୟାନରେ ଝୁଲାଇ ଦେଲେ ମହିଳା ଡାକ୍ତର। ରାଜସ୍ଥାନରୁ ଆସିଛି ଏଭଳି ଏକ ସମ୍ବେଦନଶୀଳ ଘଟଣା।ରାଜସ୍ଥାନର ମହିଳା ଡାକ୍ତର ଅର୍ଚ୍ଚନା ଶର୍ମା ନିଜର ନିର୍ଦ୍ଦୋଷତା ପ୍ରମାଣ କରିବାକୁ ଆତ୍ମହତ୍ୟା କରିଛନ୍ତି। ଗତ ମଙ୍ଗଳବାର (29 ମାର୍ଚ୍ଚ 2022) ରେ ସେ ନିଜ ଘରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ଆଉ ଆତ୍ମହତ୍ୟା କରିବା ପୂର୍ବରୁ ସେ ଏକ ସୁଇସାଇଡ ନୋଟ ବି ଛାଡି ଯାଇଛନ୍ତି। ସେ ରାଜସ୍ଥାନର ଡାଉସା ଜିଲ୍ଲାର ଲାଲସୋଟ ସହରର ଏକ ଘରୋଇ ଡାକ୍ତରଖାନାରେ ଡାକ୍ତର ଥିଲେ। ପ୍ରସବ ସମୟରେ ଜଣେ ମହିଳାଙ୍କ ମୃତ୍ୟୁ ହେବା ପରେ ତାଙ୍କ ସମ୍ପର୍କୀୟମାନେ ମହିଳା ଡାକ୍ତରଙ୍କ ବିରୋଧରେ ହତ୍ୟା ମାମଲା ଦାୟର କରିଥିଲେ।
ରିପୋର୍ଟ ଅନୁଯାୟୀ, ଡକ୍ଟର ଅର୍ଚ୍ଚନା ଏବଂ ତାଙ୍କ ସ୍ୱାମୀ ଡକ୍ଟର ସୁନୀତ ଉପାଧ୍ୟାୟଙ୍କ ଲାଲସୋଟ ସହରରେ ଆନନ୍ଦ ନାମକ ଏକ ଡାକ୍ତରଖାନା ଅଛି। ନିକଟସ୍ଥ କେମୱାସ୍ ଗାଁରେ ଉକ୍ତ ସ୍ଥାନର ବାସିନ୍ଦା ଲାଲୁରାମ ବାଇରୱାଙ୍କ ପତ୍ନୀ ଆଶା ଗର୍ଭବତୀ ଥିଲେ ଏବଂ ସୋମବାର ତାଙ୍କୁ ପ୍ରସବ ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଥିଲା।
ଯେତେବେଳେ ମହିଳାଙ୍କର ପ୍ରସବ ଅପରାହ୍ନରେ ଆରମ୍ଭ ହେଲା, ଅତ୍ୟଧିକ ରକ୍ତସ୍ରାବ ହେତୁ ସେ ମୃତ୍ୟୁ ବରଣ କଲେ। ତେବେ ନବଜାତ ଶିଶୁକୁ ଜୀବନ୍ତ ଉଦ୍ଧାର କରାଯାଇଥିଲା। ତେବେ ନବଜାତ ଶିଶୁର ମାଆର ମୃତ୍ୟୁରେ ସମ୍ପର୍କୀୟମାନେ କ୍ଷତିପୂରଣ ଦାବିରେ ଡାକ୍ତରଖାନା ବାହାରେ ବିକ୍ଷୋଭ ପ୍ରଦର୍ଶନ କରିଥିଲେ। ଆହୁରି ମଧ୍ୟ, ଲାଲସୋଟ ପୋଲିସ ଷ୍ଟେସନରେ ହତ୍ୟାକାଣ୍ଡର ଧାରା 302 ଅନୁଯାୟୀ ଡାକ୍ତର ଅର୍ଚ୍ଚନାଙ୍କ ବିରୋଧରେ ଏକ ମାମଲା ରୁଜୁ କରିଥିଲେ।
ତାଙ୍କ ପରିବାର ଜଣେ ସଦସ୍ୟଙ୍କ କହିବା ଅନୁଯାୟୀ, ଯେତେବେଳେ ସେ ମଙ୍ଗଳବାର ଦିନ ପ୍ରାୟ ୧୧ଟା ସମୟରେ ଘରର ତୃତୀୟ ମହଲାରେ ଥିବା ଡକ୍ଟରଙ୍କ କୋଠରୀକୁ ଯାଇଥିଲେ, ସେତେବେଳେ ଭିତର କବାଟ ବନ୍ଦ ଥିଲା। ଦୀର୍ଘ ସମୟ ଧରି ଡାକିବା ପରେ ମଧ୍ୟ ସେ କବାଟ ଖୋଲି ନଥିଲେ। ଏହା ପରେ ଅର୍ଚ୍ଚନାଙ୍କ ସ୍ୱାମୀ କବାଟ ଭାଙ୍ଗି ଭିତରକୁ ଯାଇଥିଲେ। ଆଉ ସ୍ତ୍ରୀର ଆତ୍ମହତ୍ୟାର ଶରୀର ଦେଖି ଅବାକ୍ ହୋଇଯାଇଥିଲେ। ଲାଲସୋଟ ପୋଲିସ ଷ୍ଟେସନ ଅଧିକାରୀ ଅଙ୍କେଶ ଚୌଧୁରୀ କହିଛନ୍ତି ଯେ ପୋଷ୍ଟମର୍ଟମ ପରେ ମୃତଦେହ ସମ୍ପର୍କୀୟଙ୍କୁ ହସ୍ତାନ୍ତର କରାଯାଇଛି। ଆଉ ଘଟଣାର ତଦନ୍ତ ଚାଲିଛି।
