‘ଦିଲ୍ ବେଚାରା’ ସୁଶାନ୍ତ ସିଂ ରାଜପୁତଙ୍କ ଶେଷ ଫିଲ୍ମ । ଅଚାନକ ତାଙ୍କ ବିୟୋଗ ଯୋଗୁ ଫିଲ୍ମ ସହିତ ପ୍ରଶଂସକମାନଙ୍କ ଏକ ଭାବପ୍ରବଣତା ବି ଯୋଡ଼ି ହୋଇଯାଇଛି । ୨୦୧୯-୨୦ ଆରମ୍ଭ ଭିତରେ ଏହି ଫିଲ୍ମ ରିଲିଜ୍ ତାରିଖକୁ ଦୁଇ ଥର ସ୍ଥଗିତ ରଖାଯାଇଥିଲା । ମାତ୍ର ଜୁନ ମାସରେ ‘ଦିଲ୍ ବେଚାରା’ର ନିର୍ମାତାମାନେ ସୁଶାନ୍ତ ସିଂଙ୍କୁ ଶ୍ରଦ୍ଧାଞ୍ଜଳି ସ୍ୱରୂପ ଏହାକୁ ଅନଲାଇନ ଷ୍ଟ୍ରିମ୍ କରିବାକୁ ନିଷ୍ପତ୍ତି ନେଇଥିଲେ । ହେଲେ ଆଜି ସେ ଫିଲ୍ମର ଟ୍ରେଲର ରିଲିଜ୍ ହୋଇଯାଇଛି ।
ସୁଶାନ୍ତ ସିଂ ରାଜପୁତଙ୍କ ଶେଷ ଫିଲ୍ମ ‘ଦିଲ ବେଚାରା’ର ଫିଲ୍ମରେ ସୁଶାନ୍ତଙ୍କ ବିପକ୍ଷରେ ସଞ୍ଜନା ସାଂଘୀ ଅଭିନୟ କରିଛନ୍ତି । ମୃତ୍ୟୁ ପୂର୍ବରୁ ସଞ୍ଜନା ହିଁ ସୁଶାନ୍ତଙ୍କ ସହିତ ସୁଟିଙ୍ଗ ସେଟରେ ସବୁଠାରୁ ଅଧିକ ସମୟ ବିତାଇଥିଲେ ଯାହା ସଞ୍ଜନା ସବୁବେଳେ ମନେପକାଉଛନ୍ତି । ଅଭିନେତ୍ରୀ ସଞ୍ଜନାଙ୍କ କହିବାନୁଯାୟୀ ସୁଶାନ୍ତ ଓ ତାଙ୍କର ଅନେକ ଅଭ୍ୟାସ ଏକାଭଳି ।
ସଞ୍ଜନା ଆହୁରି ବି କହିଛନ୍ତି ଯେ ଫିଲ୍ମ ସୁଟିଂ ସେଟରେ ପ୍ରଥମ ଦିନରୁ ହିଁ ସୁଶାନ୍ତଙ୍କ ସହିତ ତାଙ୍କର ଭଲ ବନ୍ଧୁତା ଗଢି ଉଠିଥିଲା । ସୁଶାନ୍ତ ବହୁତ କମ କଥାବାର୍ତ୍ତା କରନ୍ତି ତଥାପି ସଞ୍ଜନାଙ୍କ ସହିତ ସେ ବହୁତ ଫ୍ରି ଥିଲେ । ସୁଶାନ୍ତଙ୍କ ଭଳି ସେ ମଧ୍ୟ କଲେଜ ଟପର ଥିଲେ । ସୁଶାନ୍ତ ସିଂ ଫିଜିକ୍ସରେ ଟପ୍ କରିଥିବାବେଳେ ସେ ପଲିଟିକାଲ ସାଇନ୍ସରେ ଟପ୍ କରିଥିଲେ । ସଞ୍ଜନା କୁହନ୍ତି ଯେ ସୁଟିଂ ସେଟରେ ସମୟ ପାଇଲେ ମାତ୍ରେ ଉଭୟ ନିଜ ନିଜ ବହି ଧରି ଭିନ୍ନ ଭିନ୍ନ ପ୍ରସଙ୍ଗରେ ଘଣ୍ଟା ଘଣ୍ଟା ଧରି ଆଲୋଚନା କରୁ ।
ତେବେ ସୂଚନା ଅନୁଯାୟୀ ସୁଶାନ୍ତଙ୍କ ଶେଷ ଫିଲ୍ମ ‘ଦିଲ ବେଚାରା’ ଜୁଲାଇ ୨୪ ତାରିଖରେ ଡିଜ୍ନି ପ୍ଲସ ହଟଷ୍ଟାରରେ ରିଲିଜ୍ ହେବ । କାଷ୍ଟିଂ ନିର୍ଦ୍ଦେଶକରୁ ଫିଲ୍ମ ନିର୍ଦ୍ଦେଶକ ହୋଇଥିବା ମୁକେଶ ଛାବଡ଼ାଙ୍କର ଏହା ପ୍ରଥମ ଫିଲ୍ମ । ଏହି ଫିଲ୍ମଟି ଓଟିଟି ପ୍ଲାଟଫର୍ମର ସମସ୍ତ ସବ୍ସସକ୍ରାଇବର ତଥା ନନ୍ ସବ୍ସସକ୍ରାଇବରଙ୍କ ପାଇଁ ଉପଲବ୍ଧ ହେବ । ଫିଲ୍ମ ଦେଖିବା ପାଇଁ ୟୁଜର୍ସଙ୍କୁ କେବଳ ଡିଜ୍ନି ପ୍ଲସ ହଟଷ୍ଟାର ଆପ ଡାଉନଲୋଡ଼ କରିବାକୁ ହେବ ଆଉ ବିନା ଶୁଳ୍କରେ ଫିଲ୍ମ ଦେଖିପାରିବେ ।
