ସାରା ବିଶ୍ଵରେ ଥିବା ଫିଲ୍ମ ଜଗତର ସର୍ବାଧିକ ରୋଜଗାର କରୁଥିବା ପୁରୁଷ ଅଭିନେତାଙ୍କ ପ୍ରସଙ୍ଗ ଯଦି ନେବା ତେବେ ସେ ତାଲିକାରେ ପ୍ରଥମ ୧୦ ଜଣଙ୍କ ଭିତରେ ରହିବେ ବଲିଉଡ଼ ଇଣ୍ଡଷ୍ଟ୍ରିର ଖିଲାଡ଼ିଓ କା ଖିଲାଡ଼ି ଅକ୍ଷୟ କୁମାର । ନିକଟରେ ଲୋକପ୍ରିୟ ଅନ୍ତର୍ଜାତୀୟ ପତ୍ରିକା ଫୋର୍ବସ୍ ୨୦୨୦ ରେ ବିଶ୍ଵର ୧୦ ଜଣ ସର୍ବାଧିକ ରୋଜଗାର କରୁଥିବା ପୁରୁଷ ଅଭିନେତା ତାଲିକାରେ ଏକମାତ୍ର ଭାରତୀୟ ଭାବେ ସ୍ଥାନ ପାଇଛନ୍ତି ଅକ୍ଷୟ କୁମାର ।
ସୂଚନା ଅନୁଯାୟୀ ବାର୍ଷିକ ୪୮.୫ ମିଲିୟନ୍ ଡଲାର ଆୟ କରି ୬ ଷ୍ଠ ସ୍ଥାନ ଅଧିକାର କରିଛନ୍ତି ମଲ୍ଟି ଟ୍ୟାଲେଣ୍ଟେଡ଼ ଅକ୍ଷୟ କୁମାର । ଏହା ପୂର୍ବରୁ ବି ୨୦୧୯ ମସିହାରେ ଅକ୍ଷୟ କୁମାର ୪ ର୍ଥ ସ୍ଥାନ ଅଧିକାର କରିଥିଲେ । ଫୋର୍ବସ୍ ୨୦୨୦ ପତ୍ରିକାରେ ଉଲ୍ଲେଖ କରାଯାଇଛି ଯେ ଏକ ଷ୍ଟ୍ରିମିଂ ପ୍ଲାଟଫର୍ମରେ ପ୍ରସାରିତ ହୋଇଥିବା ଟେଲିଭିଜନ୍ ଧାରାବାହିକ “ଦି ଏଣ୍ଡ” ଲାଗି ବିଜ୍ଞାପନ ଚୁକ୍ତିନାମାରୁ ବହୁତ ଅର୍ଥ ଉପାର୍ଜନ କରିଥିଲେ ଅକ୍ଷୟ । ଏମିତିକି ଆଗାମୀ ଟେଲିଭିଜନ ଧାରାବାହିକରେ ନିଜ ଭୂମିକା ପାଇଁ ଅକ୍ଷୟ କୁମାର ୧୦ ମିଲିୟନ ଡଲାର ପାଉଛନ୍ତି ।
ତେବେ ରେ ବିଶ୍ଵର ୧୦ ଜଣ ସର୍ବାଧିକ ରୋଜଗାର କରୁଥିବା ପୁରୁଷ ଅଭିନେତା ତାଲିକାରେ ପ୍ରଥମ ସ୍ଥାନ ଅଧିକାର କରିଛନ୍ତି ହଲିଉଡ ତାରକା ଡୱେନ ଜନସନ । ସେ କ୍ରମାଗତ ଦ୍ୱିତୀୟ ବର୍ଷ ପାଇଁ ୮୭.୫ ମିଲିୟନ ଡଲାର ଆୟ କରି ଶୀର୍ଷ ସ୍ଥାନ ଅଧିକାର କରିଛନ୍ତି । ଦ୍ଵିତୀୟ ସ୍ଥାନରେ ରହିଛନ୍ତି ରିୟାନ୍ ରେନୋଲ୍ଡସ୍ ଏବଂ ଅଭିନେତା-ନିର୍ମାତା ମାର୍କ ୱାଲବର୍ଗ ଏହି ଦୌଡ଼ରେ ତୃତୀୟ ସ୍ଥାନ ଅଧିକାର କରିଛନ୍ତି ।
ସୂଚନା ଥାଉ ଯେ ଅକ୍ଷୟ କୁମାରଙ୍କ ଆଗାମୀ ଫିଲ୍ମଗୁଡ଼ିକ ମଧ୍ୟରେ ରହିଛି “ବଚ୍ଚନ ପାଣ୍ଡେ”, “ବେଲବଟମ୍”, “ଲକ୍ଷ୍ମୀ ବମ୍”, “ସୂର୍ଯ୍ୟବଂଶୀ”, “ପ୍ରୀତିରାଜ”, “ଅତରଙ୍ଗି ରେ” ଏବଂ “ରାଧା ବୃନ୍ଦାବନ” ।
