ସଂସ୍କାର :- ପୁଣିଥରେ ଆରମ୍ଭ ହେବାକୁ ଯାଉଛି କ୍ରିକେଟର ମହାକୁମ୍ଭ ଆଇପିଏଲ। କରୋନା କାରଣରୁ ଅଧାରୁ ବନ୍ଦ ହୋଇଥିବା ଏହି ଟୁର୍ଣ୍ଣାମେଣ୍ଟ ପୁଣିଥରେ ଆସନ୍ତା ସେପ୍ଟେମ୍ବର ୧୯ ତାରିଖରୁ ଖେଳାଯିବ। ବିସିସିଆଇ ଆଇପିଏଲ୍ ଦ୍ୱିତୀୟ ପର୍ଯ୍ୟାୟ ଖେଳସୂଚୀ ଘୋଷଣା କରିଛି। ଆଇପିଏଲ୍ ୨୦୨୧ର ଅବଶିଷ୍ଟ ୩୧ ଟି ମ୍ୟାଚ୍ ୧୯ ସେପ୍ଟେମ୍ବରରୁ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ରେ ଖେଳାଯିବ | ଦ୍ୱିତୀୟ ପର୍ଯ୍ୟାୟର ପ୍ରଥମ ମ୍ୟାଚ୍ ୧୯ ସେପ୍ଟେମ୍ବରରେ ମୁମ୍ବାଇ ଇଣ୍ଡିଆନ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ଖେଳାଯିବ | ସମସ୍ତ ୩୧ ଟି ମ୍ୟାଚ୍ ୨୭ ଦିନ ମଧ୍ୟରେ ଖେଳାଯିବ | ଏହି ୩୧ ଟି ମ୍ୟାଚ୍ ମଧ୍ଯରୁ ୧୩ ଟି ଦୁବାଇରେ, ୧୦ଟି ଶାରଜା ଏବଂ ୮ଟି ଆବୁଧାବିର ଷ୍ଟାଡିୟମରେ ଖେଳାଯିବ।
ଅନ୍ୟପକ୍ଷରେ ଅକ୍ଟୋବର ୧୦ ତାରିଖରୁ ନକ୍ ଆଉଟ୍ ରାଉଣ୍ଡ ଆରମ୍ଭ ହେବ। କ୍ୱାଲିଫାୟର-୧ ର ମ୍ୟାଚ୍ ଅକ୍ଟୋବର ୧୦ ରେ, ଏଲିମିନେଟର ଅକ୍ଟୋବର ୧୧ ରେ ଏବଂ କ୍ୱାଲିଫାୟର -୨ ଅକ୍ଟୋବର ୧୩ ତାରିଖରେ ଖେଳାଯିବ ବୋଲି ବିସିସିଆଇ ଖେଳସୂଚୀରେ ପ୍ରକାଶ କରିଛି। ଶେଷରେ ଅକ୍ଟୋବର ୧୫ ତାରିଖରେ ଦୁବାଇରେ ଆଇପିଏଲ ୨୦୨୧ ର ଫାଇନାଲ ମ୍ୟାଚ୍ ଖେଳାଯିବ | ଏହା ପରେ ବିସିସିଆଇକୁ ୟୁଏଇ ଏବଂ ଓମାନରେ ଆସନ୍ତା ଟି-୨୦ ବିଶ୍ୱକପ ପାଇଁ ଆୟୋଜନ କରିବାକୁ ପଡିବ।
ଆଇପିଏଲ୍ – ୨୦୨୧ ଭାରତରେ ୯ ଏପ୍ରିଲରୁ ଆରମ୍ଭ ହୋଇଥିଲା | କିନ୍ତୁ ମଧ୍ୟଭାଗରେ ସନରାଇଜର୍ସ ହାଇଦ୍ରାବାଦର ରିଦ୍ଧିମାନ ସାହା, ଦିଲ୍ଲୀ କ୍ୟାପିଟାଲ୍ସର ଅମିତ ମିଶ୍ର, ସନ୍ଦୀପ ୱାରିଅର୍ ଏବଂ କେକେଆରର ବରୁଣ ଚକ୍ରବର୍ତ୍ତୀ, ସିଏସକେର ବୋଲିଂ କୋଚ୍ ଲକ୍ଷ୍ମୀପାଥୀ ବାଲାଜୀ ଏବଂ ବ୍ୟାଟିଂ ପ୍ରଶିକ୍ଷକ ମାଇକେଲ ହସି କରୋନା ସଂକ୍ରମିତ ହୋଇଥିବା ଜଣାପଡିଥିଲା। ଏଭଳି ପରିସ୍ଥିତିରେ ୨୯ ଟି ମ୍ୟାଚ୍ ପରେ ମେ ୪ ତାରିଖରେ ଆଇପିଏଲ୍ ସ୍ଥଗିତ ରଖାଯାଇଥିଲା। ତେବେ ବର୍ତ୍ତମାନ ଲିଗରେ ୩୧ଟି ମ୍ୟାଚ୍ ବାକି ରହିଥିବା ବେଳେ ଆସନ୍ତା ସେପ୍ଟେମ୍ବର ୧୯ ତାରିଖରୁ ୟୁଏଇରେ ଖେଳାଯିବ।
