ସଂସ୍କାର: ରାତି ଅଧରେ ଚୋରି କରୁଥିବା ସମୟରେ ଘଟିଲା ଅଘଟଣ । ବିଦ୍ୟୁତ ଟ୍ରାନ୍ସଫର୍ମର ଚୋରି କରୁଥିବା ସମୟରେ ଜଣେ ଚୋର ବିଦ୍ୟୁତ ତାରରେ ଲାଗିଯାଇଛି। ଫଳରେ ତାହାର ମୃତ୍ୟୁ ହୋଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବହଳଦା ଥାନା ଅଞ୍ଚଳରେ ।
ସୂଚନାଅନୁଯାୟୀ, ବହଳଦା ଥାନା ସାନଦୁନ୍ଦୁ ଗ୍ରାମରେ ବିପିଏଲ୍ ଶ୍ରେଣୀର ପରିବାରମାନଙ୍କ ନିମନ୍ତେ ୩୩ କେ.ଭି ଟ୍ରାନ୍ସଫର୍ମରଟି ଗାଁ ମୁଣ୍ଡରେ ବିଦ୍ୟୁତ ବିଭାଗ ପକ୍ଷରୁ ବସାଯାଇଥିଲା। ତେବେ ଆଜି ସକାଳୁ ଗ୍ରାମର କିଛି ଲୋକ ଶୌଚ ପାଇଁ ଗାଁ ମୁଣ୍ଡକୁ ଯାଇଥିବା ସମୟରେ ଟ୍ରାନ୍ସଫର୍ମର ପାଖରେ ଏକ ଯୁବକଙ୍କ ମୃତଦେହ ପଡିଥିବାର ଦେଖିବାକୁ ପାଇ ବହଳଦା ଥାନାକୁ ଖବର ଦେଇଥିଲେ ଲୋକେ।
ତେବେ ବହଳଦା ପୋଲିସ୍ ଖବର ପାଇ ଘଟଣାସ୍ଥଳରେ ପହଞ୍ଚିବା ସହ ଟ୍ରାନ୍ସଫର୍ମର ଚୋରି କରୁଥିବା ବେଳେ ବିଦ୍ୟୁତ ଆଘାତରେ ଚୋରର ମୃତ୍ୟୁ ଘଟିଥିବା ପ୍ରାଥମିକ ତଦନ୍ତରୁ ପୋଲିସ ଜାଣିବାକୁ ପାଇଛି । ଏହି ଘଟଣାରେ ଅନ୍ୟମାନଙ୍କର ମଧ୍ୟ ସମ୍ପୃକ୍ତ ଥିବାର ଅନୁମାନ କରାଯାଉଛି। ଅନ୍ୟପକ୍ଷରେ ଶବକୁ ଜବତ କରି ପୋଲିସ୍ ରାଇରଙ୍ଗପୁର ଉପଖଣ୍ଡ ଚିକିତ୍ସାଳୟକୁ ବ୍ୟବେଛଦ ପାଇଁ ପାଠାଇଛି। ତେବେ ମୃତ ବ୍ୟକ୍ତିଙ୍କ ପରିଚୟ ମିଳିନାହିଁ ।
