ସଂସ୍କାର : ଅଯୋଧ୍ୟାରେ ପଞ୍ଜାବ ନ୍ୟାସନାଲ ବ୍ୟାଙ୍କରେ ପ୍ରୋବେସନାରୀ ଅଫିସର ଭାବରେ ପୋଷ୍ଟ ହୋଇଥିବା ଜଣେ ଯୁବତୀଙ୍କ ଆତ୍ମହତ୍ୟା ମାମଲା ସାମ୍ନାକୁ ଆସିଛି। ଆତ୍ମହତ୍ୟା ନୋଟରେ ଯୁବତୀ ଜଣଙ୍କ ତାଙ୍କ ପୂର୍ବତନ ପ୍ରେମିକଙ୍କ ସମେତ ୩ ଜଣଙ୍କୁ ଦାୟୀ କରିଛନ୍ତି। ଅନ୍ୟପଟେ ଏହି ମାମଲାରେ ପୂର୍ବତନ ୟୁପି ସିଏମ ଏବଂ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ତଦନ୍ତ ଦାବି କରିଛନ୍ତି। ଅନ୍ୟପଟେ ପୋଲିସ୍ ମଧ୍ୟ ଗତକାଲି ରାତିରୁ ଶବକୁ ବ୍ୟବଚ୍ଛେଦ ପାଇଁ ପଠାଇ ଦେଇଛି।
ଅଯୋଧ୍ୟାରେ ପଞ୍ଜାବ ନ୍ୟାସନାଲ ବ୍ୟାଙ୍କରେ ସରକାରୀ କର୍ମଚାରୀ ଭାବରେ ପୋଷ୍ଟିଂ ହୋଇଥିବା ଜଣେ ଯୁବତୀଙ୍କ ମୃତଦେହ ସନ୍ଦେହଜନକ ଅବସ୍ଥାରେ ଏକ କୂଅରେ ଝୁଲୁଥିବାର ଦେଖିବାକୁ ମିଳିଥିଲା। ଘଟଣା ସମ୍ପର୍କରେ ସୂଚନା ପାଇବା ମାତ୍ରେ ପୋଲିସ ଘଟଣାର ତଦନ୍ତ ଆରମ୍ଭ କରିଥିଲା। ତେବେ ଘଟଣାସ୍ଥଳରୁ ଏକ ଆତ୍ମହତ୍ୟା ଚିଠି ମଧ୍ୟ ଜବତ କରାଯାଇଛି। ଏଥିରେ ଯୁବତୀଜଣଙ୍କ ନିଜର ମୃତ୍ୟୁ ପାଇଁ ତିନି ଜଣଙ୍କୁ ଦାୟୀ କରିଛନ୍ତି। ଗୋଟିଏ ନାମ ହେଉଛି ବିବେକ ଗୁପ୍ତାଙ୍କର, ଯାହା ସହିତ ଯୁବତୀଙ୍କର ବିବାହ ସ୍ଥିର ହୋଇଥିଲା। କିନ୍ତୁ ପରେ ବିବାହ ଭାଙ୍ଗି ଯାଇଥିଲା। ଆତ୍ମହତ୍ୟା ନୋଟରେ ଥିବା ଅବଶିଷ୍ଟ ଦୁଇଜଣଙ୍କର ନାମ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଏଥିରେ ପ୍ରଥମ ନାମ ଆଶିଷ ତିୱାରୀ (ଏସଏସଏଫ)। ଆଶିଷ ଏସଏସଏଫର ଲକ୍ଷ୍ନୌ ଜୋନରେ ମୁଖ୍ୟ ଭାବରେ କାର୍ଯ୍ୟ କରୁଛନ୍ତି। ଦ୍ୱିତୀୟ ନାମଟି ହେଲା ଅନିଲ ରାୱତ। ଯିଏକି ପୋଲିସ ବିଭାଗରେ କାମ କରୁଛନ୍ତି। ଅଯୋଧ୍ୟା ପୋଲିସ ପୂର୍ବତନ ପ୍ରେମିକ ତଥା ଯୁବତୀଙ୍କର ମଙ୍ଗେତର ବିବେକ ଗୁପ୍ତାଙ୍କୁ ଗିରଫ କରିଛି। ଆଉ ବିବେକଙ୍କୁ ପଚରାଉଚରା କରାଯାଉଛି।
ଏହି ପ୍ରସଙ୍ଗରେ ଅଖିଳେଶ ଯାଦବ ଟୁଇଟ୍ କରି କହିଛନ୍ତି ଯେ ଅଯୋଧ୍ୟାରେ ପଞ୍ଜାବ ନ୍ୟାସନାଲ ବ୍ୟାଙ୍କର ଜଣେ ମହିଳା କର୍ମଚାରୀଙ୍କ ଆତ୍ମହତ୍ୟା ମାମଲାରେ ମିଳିଥିବା ଆତ୍ମହତ୍ୟା ନୋଟରେ ପୋଲିସକୁ ସିଧାସଳଖ ଅଭିଯୁକ୍ତ କରାଯାଇଛି। ୟୁପିରେ ଏହା ଏକ ଖରାପ ଆଇନ ଏବଂ ବ୍ୟବସ୍ଥାର ଅତିକ୍ତ ସତ୍ୟ ଅଟେ। ଏଥିରେ ସିଧାସଳଖ ଜଣେ ଆଇପିଏସ୍ ଅଧିକାରୀଙ୍କ ନାମ ରଖିବା ଅତ୍ୟନ୍ତ ଗମ୍ଭୀର ପ୍ରସଙ୍ଗ। ଏଥିରେ ଏକ ଉଚ୍ଚ ସ୍ତରୀୟ ନ୍ୟାୟିକ ଅନୁସନ୍ଧାନ ହେବା ଉଚିତ୍।
