ସାରା ରାଜ୍ୟରେ ବର୍ତ୍ତମାନ ଗୋଟିଏ ଚର୍ଚ୍ଚା।ASI ଗୋପାଳ କାହିଁକି ହତ୍ୟା କଲା ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କୁ ? କ’ଣ ଏହା ପଛର କାରଣ ? ତେବେ ଏସବୁ ବିଷୟରେ ସବୁ ସତ କହିଛି ଅଭିଯୁକ୍ତ ଗୋପାଳ ଦାସ। ନାର୍କୋ ଟେଷ୍ଟରେ ଅଭିଯୁକ୍ତ ଗୋପାଳ ସବୁ ସତ ମାନିଥିବା ରାଜ୍ୟ ଗଣମାଧ୍ୟମ ସୁତ୍ରରୁ ସୂଚନା ମିଳିଛି। କ୍ରାଇମବ୍ରାଞ୍ଚର ଜଣେ ବରିଷ୍ଠ ଅଧିକାରୀ ଗଣମାଧ୍ୟମକୁ ଏହି ସୂଚନା ଦେଇଛନ୍ତି।
କେମିତି ଓ କାହିଁକି ମାରିଛି ସବୁ ନାର୍କୋ ଟେଷ୍ଟରେ ଗୋପାଳ କହିଛି। ଗୋପାଳର ମାନସିକ ସ୍ଥିତି କ’ଣ ଥିଲା, ତାହା ମଧ୍ୟ ସେ ମାନିଥିବା ଜଣାପଡିଛି। ଚଳିତ ସପ୍ତାହରେ ଗୋପାଳର ନାର୍କୋ ଟେଷ୍ଟ ରିପୋର୍ଟ ଆସିବ ବୋଲି କ୍ରାଇମବ୍ରାଞ୍ଚ କହିଛି। ସେପଟେ ଗୋପାଳର ସୁରକ୍ଷା ନେଇ ଏବେ ଚିନ୍ତାରେ ପଡ଼ି ଯାଇଛନ୍ତି ଜେଲ୍ କର୍ତ୍ତୃପକ୍ଷ।
ଝାରସୁଗୁଡା ରୁ ଅନ୍ୟତ୍ର ସ୍ଥାନାନ୍ତର ପାଇଁ ଜେଲ୍ ବିଭାଗ ପ୍ରସ୍ତାବ ଦେଇଥିଲେ। ଗୋପାଳକୁ ଚୌଦ୍ୱାର ଜେଲ୍କୁ ପଠାଇବାକୁ ଝାରସୁଗୁଡା ଜେଲ୍ ଅଧୀକ୍ଷକଙ୍କ ଜରିଆରେ ଜେଲ୍ ବିଭାଗକୁ ଅବଗତ କରାଯାଇଥିଲା। ପୂର୍ବରୁ ଝାରସୁଗୁଡା ଜେଲ୍ ପକ୍ଷରୁ ଜେଲ୍ ବିଭାଗକୁ ଚିଠି ଲେଖା ଯାଇଥିବା ସୂଚନା ମିଳିଛି। ତେବେ ଗୋପାଳକୁ କେଉଁ ଜେଲ୍ ପଠାଯିବ, ଏନେଇ ଏଡିଜି ସ୍ଥିର କରିଥିଲେ।
ସେପଟେ ଗୋପାଳକୁ ପୁଣି କୋର୍ଟରେ ହାଜର କରାଯାଇଥିଲା। ଝାରସୁଗୁଡ଼ା JMFC କୋର୍ଟରେ ଗୋପାଳ ହାଜର ହୋଇଥିଲା । ଅଭିଯୁକ୍ତ ଗୋପାଳର ମଧ୍ୟ ୧୬୪ ବୟାନ ରେକର୍ଡ କରାଯାଇଛି। କୋର୍ଟରେ ବୟାନ ରେକର୍ଡ ନେଇ ଗୋପାଳର ଓକିଲ ସୂଚନା ଦେଇଛନ୍ତି।
