ସଂସ୍କାର: ଆଜିର ଡିଜିଟାଲ ଯୁଗରେ ଅନେକ ବ୍ୟକ୍ତି ରାତାରାତି ଜିରୋରୁ ହିରୋ ପାଲଟି ଯାଉଛନ୍ତି। ଆମ ରାଜ୍ୟରେ କେତେକ ବ୍ୟକ୍ତିତ୍ୱ ମଧ୍ୟ ସୋସିଆଲ ମିଡ଼ିଆରୁ ଷ୍ଟାର୍ ହୋଇଛନ୍ତି। ତେବେ ସେମାନଙ୍କ ମଧ୍ୟରୁ ଜଣେ ହେଉଛନ୍ତି ବିଶିଷ୍ଟ ଯାତ୍ରା ଅଭିନେତ୍ରୀ ନିଶା ମହାରଣା। ଖୁବ୍ କମ୍ ସମୟ ମଧ୍ୟରେ ନିଶା ଆଜି ସାରା ଓଡ଼ିଶାର ଘରେ ଘରେ ପରିଚିତ ହୋଇ ପାରିଛନ୍ତି।
ତେବେ ଏହା ମଧ୍ୟରେ ନିଶାଙ୍କୁ ନେଇ ଆସିଛି ଏକ ବଡ଼ ଖବର୍। ଗତକାଲି ରଙ୍ଗର ପର୍ବ ହୋଲି ଅବସରରେ ନିଶା ରାଜ୍ୟ କଂଗ୍ରେସ ଭବନରେ ବରିଷ୍ଠ କଂଗ୍ରେସ ନେତା ତଥା ଜଟଣୀ ବିଧାୟକ ସୁର ରାଉତରାୟଙ୍କ ସହ ହୋଲି ଖେଳିଛନ୍ତି। ଯାହାର ଭିଡ଼ିଓ ବର୍ତ୍ତମାନ ସୋସିଆଲ ମିଡ଼ିଆରେ ଭାଇରାଲ୍ ହେବାରେ ଲାଗିଛି। କଂଗ୍ରେସ ଭବନରେ ବାଜା ବଜାଇ ଏକ ନିଆରା ଢଙ୍ଗରେ ହୋଲି ଉତ୍ସବ ପାଳନ କରିଥିଲେ ନିଶା ଆଉ ସୁର।କଂଗ୍ରେସ ଭବନରେ ରଙ୍ଗ ଉତ୍ସବରେ ସାମିଲ ହୋଇଥିଲେ ଅଭିନେତ୍ରୀ ନିଶା।
ନିଶା କଂଗ୍ରେସରେ ଯୋଗ ଦେବା ନେଇ ପ୍ରଶ୍ନର ଉତ୍ତରରେ ସୁର କହିଥିଲେ, ନିଶା ଜଣେ ବଡ଼ କଳାକାର। ସରସ୍ୱତୀ, ଆଲ୍ଲା, ଯୀଶୁଙ୍କ ଆଶିର୍ବାଦ ତାଙ୍କ ଉପରେ ରହିଛି। ସେ ଓଡ଼ିଶାର ଜଣେ ବଡ଼ ପ୍ରତିଭା, ତାଙ୍କର ଅଭିନୟରେ ଦର୍ଶକ ମୁଗ୍ଧ ହୋଇପଡ଼ୁଛନ୍ତି। ସେ ଫିଲ୍ମ ଓ ସଙ୍ଗୀତ ଦୁନିଆରେ ଲୋକଙ୍କର ହୃଦୟକୁ କିଣିସାରିଛନ୍ତି। ସେ ବହୁତ ଆଗକୁ ଯାଆନ୍ତୁ ଏହା ହିଁ ଆମର କାମନା।
ଏହି ଅବସରରେ ଅଭିନେତ୍ରୀ କହିଥିଲେ, ଆଜି ଏକ ପବିତ୍ର ଦିନରେ ମୁଁ ସୁର ଭାଇଙ୍କ ସହିତ ସାକ୍ଷାତ କରି ନିଜକୁ ଧନ୍ୟ ମନେକରୁଛି। ଭାଇଙ୍କୁ ଶ୍ରୀଜଗନ୍ନାଥ ଭଲରେ ରଖନ୍ତୁ ଏହି ହିଁ ମୋର ତାଙ୍କ ଠାରେ ପ୍ରାର୍ଥନା। ତେବେ ହୋଲି ଅବସରରେ କଂଗ୍ରେସରେ ଯୋଗଦେବା ନେଇ କିଛି ଯୋଜନା ଅଛି କି ନା ପ୍ରଶ୍ନର ଉତ୍ତରରେ ନିଶା କହିଥିଲେ, ସେପରି କିଛି ନାହିଁ। କଂଗ୍ରେସ ଦଳକୁ ଆମ ପରିବାରରେ ସମସ୍ତେ ଖୁବ୍ ଭଲ ପାଆନ୍ତି । ସୁର ଭାଇଙ୍କୁ ମୁଁ ମୋ ଦିଲରେ ଜାଗା ଦେଇଛି, ମୋତେ ଆଜି ବହୁତ ଖୁସି ଲାଗିଲା।
