ସଂସ୍କାର , (୧୩/୦୭) :- ମଝି ରାସ୍ତାରେ ଗୋଢେଇ ଗୋଢେଇ ହତ୍ୟା। ହତ୍ୟା ସମୟର ଭିଡ଼ିଓ କଏଦ୍ ହେଲା ସିସିଟିଭିର ଲେନ୍ସରେ। ଏପରି ଏକ ଚାଂଚଲ୍ୟକର ଘଟଣା ଦେଖିବାକୁ ମିଳିଛି ପୁଣେରେ। ଗତ ରବିବାର ଦିନ ଅର୍ଥାତ୍ ୧୧ ଜୁଲାଇରେ ପୁଣେ ନିକଟସ୍ଥ ପିମ୍ପ୍ରି ଚିଞ୍ଚୱାଡରେ ଜଣେ ବ୍ୟକ୍ତି ନିଜ ପଡ଼ୋଶୀଙ୍କୁ ମଝି ରାସ୍ତାରେ ଗୋଢେଇ ଗୋଢେଇ ହତ୍ୟା କରୁଥିବାର ଏକ ଭିଡ଼ିଓ ସୋସିଆଲ ମିଡିଆ ଓ ଜାତୀୟ ଗଣମାଧ୍ୟମରେ ମଧ୍ୟ ଭାଇରଲ୍ ହେଉଛି।
ତେବେ ସୋମବାର ଦିନ ଏହି ଘଟଣାର ଏକ ସିସିଟିଭି ଭିଡିଓ ସାମ୍ନାକୁ ଆସିଛି ଯେଉଁଥିରେ ଅଭିଯୁକ୍ତ ବାରମ୍ବାର ତୀକ୍ଷ୍ଣ ଅସ୍ତ୍ରରେ ଆଉ ଜଣେ ଭଦ୍ର ବ୍ୟକ୍ତିଙ୍କୁ ଆକ୍ରମଣ କରୁଥିବା ଦେଖିବାକୁ ମିଳିଛି।
ଅନ୍ୟପଟେ ହତ୍ୟା ହୋଇଥିବା ଭଦ୍ର ବ୍ୟକ୍ତିଙ୍କ ନାମ ହେଉଛି କନିଫନାଥ କ୍ଷୀରସାଗର। ରବିବାର ଦିନ ପ୍ରାୟ ଅପରାହ୍ଣ ୧ ଟା ୩୦ ସମୟରେ କନିଫନାଥ କ୍ଷୀରସାଗର ନିଜ ବନ୍ଧୁ ଏବଂ ସେମାନଙ୍କ ପିଲାଙ୍କ ସହ ଘର ବାହାରେ ଠିଆ ହୋଇଥିଲେ | ଏହି ସମୟରେ ଅଭିଯୁକ୍ତ ଆକାଶ ଯାଦବ ତାଙ୍କ ପାଖରେ ପହଞ୍ଚି ବ୍ୟାଗରେ ଲୁଚାଇ ଆଣିଥିବା ଏକ ବଡ ତୀକ୍ଷ୍ଣ ଅସ୍ତ୍ରରେ ତାଙ୍କୁ ଆକ୍ରମଣ କରିଥିଲେ।
ଆକ୍ରମଣ ପରେ କ୍ଷୀରସାଗର ସେଠାରୁ ଦୌଡିଥିଲେ, କିନ୍ତୁ କିଛି ଦୂରରେ ପରେ ପୁଣି ରାସ୍ତାରେ ପଡ଼ିବା ପରେ ଆକାଶ ତାଙ୍କୁ ଜୋରରେ ପିଟିଥିଲେ ଏବଂ ପରେ ପଥରରେ କ୍ଷୀରସାଗରଙ୍କ ମୁଣ୍ଡକୁ ଜୋରରେ ଛେଚିଥିଲେ।
ଅନୁସନ୍ଧାନରୁ ଜଣାପଡିଛି ଯେ ଉଭୟ କନିଫନାଥ ଏବଂ ଆକାଶ ଦୁହେଁ ପଡୋଶୀ । ତେବେ କିଛି ଦିନ ପୂର୍ବରୁ ଆକାଶଙ୍କୁ କିଛି ଲୋକ କୌଣସି କାରଣରୁ ନିର୍ଧୂମ ଛେଚି ଥିଲେ। ଅନ୍ୟପଟେ କନିଫନାଥଙ୍କ ନିର୍ଦ୍ଦେଶରେ ତାଙ୍କୁ ଆକ୍ରମଣ କରାଯାଇଥିବା ଆକାଶ ଅନୁଭବ କରିଥିଲା। ତେଣୁ ଏହି କାରଣରୁ ଆକାଶ ରାଗି ଯାଇ କନିଫନାଥଙ୍କୁ ମରଣାନ୍ତକ ଆକ୍ରମଣ କରିଛି।
ତେବେ ପଡୋଶୀମାନେ ଏହି ଘଟଣା ସମ୍ପର୍କରେ ପୋଲିସକୁ ସବିଶେଷ ସୂଚନା ଦେଇଥିଲେ। ଅନ୍ୟପକ୍ଷରେ କ୍ଷୀରସାଗରଙ୍କୁ ଡାକ୍ତରଖାନା ନିଆଯାଇଥିଲା, ସେଠାରେ ତାଙ୍କର ମୃତ୍ୟୁ ହୋଇ ଯାଇଛି। ହତ୍ୟା ପରେ ଅଭିଯୁକ୍ତ ଘଟଣାସ୍ଥଳରୁ ପଳାଇ ଯାଇଥିଲା, କିନ୍ତୁ କ୍ୟାମେରାରେ ଆକାଶର ଚେହେରା ଧରାପଡିଥିବାରୁ ପୋଲିସ ତାଙ୍କୁ ଚିହ୍ନିଥିଲା। ଏହା ପରେ ପୋଲିସ ଆକାଶ ର ମୋବାଇଲ୍ କୁ ଟ୍ରାକ୍ କରି ତାକୁ ଧରିଥିଲା। ଅନ୍ୟପଟେ ଅଭିଯୁକ୍ତ ଆକାଶ ତାଙ୍କ ଅପରାଧ ସ୍ୱୀକାର କରିଛି।
