ସଂସ୍କାର: ଅଟୋ ଡ୍ରାଇଭର ସହିତ ମହିଳାଙ୍କୁ ହେଲା ପ୍ରେମ। ଆଉ ମହିଳା ଜଣକ ଡ୍ରାଇଭର ପ୍ରେମରେ ଏତେ ହଜିଗଲେ ଯେ, ଘରୁ ପ୍ରାୟ ୫୦ ଲକ୍ଷ ନେଇ ଫେରାର୍ ହୋଇଗଲେ।
ତେବେ ମଧ୍ୟପ୍ରଦେଶର ଇନ୍ଦୋରରୁ ଏହି ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି, ଯେଉଁଠାରେ ଜଣେ କୋଟିପତିଙ୍କ ପତ୍ନୀ ନିଜଠାରୁ ୧୩ ବର୍ଷ ସାନ ଅଟୋ ରିକ୍ସା ଡ୍ରାଇଭର ସହିତ ଫେରାର୍ ମାରିଛନ୍ତି । ଅଭିଯୋଗ ହୋଇଛି କି, ମହିଳା ନିଜ ସହିତ ଘରୁ ୪୭ ଲକ୍ଷ ଟଙ୍କା ଚୋରି କରି ନେଇ ଚମ୍ପଟ ମାରିଛନ୍ତି ।
ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, ଏହି ଘଟଣା ଇାନ୍ଦୋରର ଖଜରାନା ଅଞ୍ଚଳର । ଏଠାରେ ଜଣେ ମହିଳାଙ୍କ ସ୍ୱାମୀ ପୋଲିସ ଷ୍ଟେସନରେ ପତ୍ନୀ ନିଖୋଜ ହେବା ଓ ଟଙ୍କା ଗାଏବ୍ ହେବା ବିଷୟରେ ଏକ ମାମଲା ରୁଜୁ କରିଛନ୍ତି । ପୋଲିସ ମାମଲାର ଛାନଭିନ୍ ଜାରି ରଖିଛି । ଆଉ ଏହି ଛାନଭିନ୍ ସମୟରେ ପୋଲିସକୁ ଯାହା ତଥ୍ୟ ମିଳିଛି ଆପଣ ଜାଣିଲେ ତାଯୁବ ହୋଇଯିବେ। ଖବର ମୁତାବକ, ୧୩ ଅକ୍ଟୋବରରୁ ଅଭିଯୁକ୍ତ ମହିଳା ନିଖୋଜ ଅଛନ୍ତି । ପତ୍ନୀ ଘରକୁ ନଆସିବାରୁ କୋଟିପତି ସ୍ୱାମୀ ଥାନାର ଦ୍ୱାରସ୍ଥ ହୋଇଥିଲେ। ମହିଳାଙ୍କ ସ୍ୱାମୀ କୋଟି କୋଟି ଟଙ୍କାର ଜମି ମାଲିକ ଥିବା ବେଳେ ସେ ଘରେ ୪୭ ଲକ୍ଷ ଟଙ୍କା କ୍ୟାସ ରଖିଥିଲେ। ତେବେ ପତ୍ନୀ ଓ ୪୭ ଲକ୍ଷ ନଗଦ ଟଙ୍କା ଘରରୁ ଗାଏବ୍ ହୋଇଛନ୍ତି। ପତ୍ନୀଘରୁ ଟଙ୍କା ନେଇ ଗାଏବ୍ ହୋଇଥିବା ସନ୍ଦେହ କରୁଛନ୍ତି ଜମି ମାଲିକ।
ପୋଲିସର କହିବା ମୁତାବକ, ମହିଳାଙ୍କ ସହ ଫେରାର ମାରିଥିବା ଅଟୋରିକ୍ସା ଡ୍ରାଇଭରର ନାଁ ଇମରାନ ଓ ତାଙ୍କ ବୟସ ୩୨ ବର୍ଷ । ପୋଲିସ ଇମରାନଙ୍କ ସାଙ୍ଗ ଘରୁ ୩୩ ଲକ୍ଷ ଟଙ୍କା ଜବତ କରିଛି । କିନ୍ତୁ ଏପର୍ଯ୍ୟନ୍ତ ସୁଦ୍ଧା ମହିଳା ଓ ଅଟୋ ରିକ୍ସା ଚାଳକକୁ ଧରିବାରେ ଅସଫଳ ହୋଇଛି ପୋଲିସ। ସେମାନଙ୍କୁ ପୋଲିସ୍ ଖୋଜିବାରେ ଲାଗିଛି।
