କରୋନା ମହାମାରୀକୁ ଦୃଷ୍ଟିରେ ରଖି କେନ୍ଦ୍ରୀୟ ବୋର୍ଡ ଅଫ୍ ଡାଇରେକ୍ଟ ଟ୍ୟାକ୍ସ (ସିବିଡିଟି) ପୂର୍ବରୁ ୨୦୧୯-୨୦ ରେ ଆୟ ହୋଇଥିବା ଆୟ ପାଇଁ ITR ଦାଖଲ କରିବାର ଶେଷ ତାରିଖ ବଢାଇ ଦିଆଯାଇଛି । ସାଧାରଣତଃ ଟିକସଦାତାମାନେ ଜୁଲାଇ ୩୧ ତାରିଖ ସୁଦ୍ଧା ITR ଦାଖଲ କରିବେ ବୋଲି ଅନୁମାନ କରାଯାଉଥିଲା କିନ୍ତୁ ମହାମାରୀ ହେତୁ ଚଳିତ ବର୍ଷ ଏହାର ବ୍ୟତିକ୍ରମ କରାଯାଇଥିଲା । ତେଣୁ, ଯଦି ଆପଣ ଏବେ ଯାଏଁ ITR ଦାଖଲ କରିନାହାନ୍ତି ତେବେ ଆପଣଙ୍କ ପାଇଁ ରହିଲା ମାତ୍ର ଆଉ ୨ ଦିନ ।
ଏହାସହିତ ଗତ ବର୍ଷ ଯେଉଁମାନେ ଧାର୍ଯ୍ୟ ତାରିଖ ସୁଦ୍ଧା ନିଜର ITR ଦାଖଲ କରିପାରି ନଥିଲେ ସେମାନେ ଯଦି ଚଳିତ ବର୍ଷ ବି ଧାର୍ଯ୍ୟ ତାରିଖ ସୁଦ୍ଧା ନିଜ ବ୍ୟକ୍ତିଗତ ITR ଦାଖଲ କରି ନପାରିଲେ ତେବେ ସେମାନଙ୍କୁ ୧୦,୦୦୦ ଟଙ୍କା ଜରିମାନା ଦେବାକୁ ପଡ଼ିବ । ଗତ ବର୍ଷ କିନ୍ତୁ ସମୟସୀମା ହରାଇଲେ ଜରିମାନା ମାତ୍ର ୫,୦୦୦ ଟଙ୍କା ଥିଲା ।
ଅବଶ୍ୟ, ଏହି ଜରିମାନା କିମ୍ବା ବିଳମ୍ବ ଦାଖଲ ଶୁଳ୍କ କେବଳ ସେତେବେଳେ ପ୍ରଯୁଜ୍ୟ ହେବ ଯଦି ଟିକସଦାତାଙ୍କ ମୋଟ ଆୟ ଆର୍ଥିକ ବର୍ଷରେ ୫ ଲକ୍ଷରୁ ଅଧିକ ହେବ । ତେବେ ଆୟକର ବିଭାଗ ଆକଳନ ବର୍ଷ ୨୦୨୦-୨୧ (୨୦୧୯-୨୦ ଆର୍ଥିକ ବର୍ଷ)ର ବ୍ୟକ୍ତିଗତ କରଦାତାଙ୍କ ITR ଦାଖଲ ତାରିଖ ଡିସେମ୍ବର ୩୧ରୁ ଜାନୁୟାରୀ ୧୦, ୨୦୨୧କୁ ଘୁଞ୍ଚାଇ ଦିଆଯାଇଛି । ଏନେଇ ଆୟକର ବିଭାଗ ଟ୍ଵିଟ୍ କରି ସୂଚନା ଦେଇଛନ୍ତି ।
ଅନ୍ୟପକ୍ଷରେ କରୋନା କଟକଣା ପାଇଁ ବୈଧାନିକ ସତର୍କତା ପାଳନ କରାଯାଉ ଥିବାରୁ କରଦାତାମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି । ଏହାକୁ ନଜରରେ ରଖି ITR ଦାଖଲ ତାରିଖ କରଦାତା ପାଇଁ ୨୦୨୧ ଜାନୁୟାରୀ ୧୦ ତାରିଖ ଯାଏଁ ବଢାଇ ଦିଆଯାଇଛି । ସେହିପରି ୨୦୨୦ ଆର୍ଥିକ ବର୍ଷ ଲାଗି ସେବା ଓ ସାମଗ୍ରୀ କର (GST) ବାର୍ଷିକ ରିଟର୍ଣ୍ଣ ପ୍ରସ୍ତୁତ କରିବା ପାଇଁ ଧାର୍ଯ୍ୟ ତାରିଖକୁ ୨୮ ଫେବୃଆରୀ ୨୦୨୧ ପର୍ଯ୍ୟନ୍ତ ବଢାଇ ଦିଆଯାଇଛି ।
