ଆଶ୍ଚର୍ଯ୍ୟ ଲାଗୁଥିଲେ ସତ ରୂପେ ପ୍ରମାଣିତ ହୋଇଛି ଏହି ଅନନ୍ୟ ଗବେଷଣା । କୌଣସି ନିରୀହ ପ୍ରାଣୀଙ୍କୁ ହତ୍ୟା ନକରି ବି ମାଂସ ଖାଇପାରିବେ ଲୋକେ । ସିଙ୍ଗାପୁର ଦେଶ ଲ୍ୟାବରେ ଉତ୍ପାଦିତ ମାଂସ ବିକ୍ରିକୁ ପ୍ରଥମ କରି ମଞ୍ଜୁରୀ ଦେଇ ଏକ ଐତିହାସିକ ପଦକ୍ଷେପ ନେଇଥିବା ପ୍ରଥମ ଦେଶ ହେବାକୁ ଯାଉଛି ।
ଆପଣ ଠିକ୍ ଶୁଣିଲେ । ଆମେରିକୀୟ କମ୍ପାନୀ ‘ଜଷ୍ଟ ଇଟ୍’ ଚିକେନ୍ ବାଇଟ୍ ଉତ୍ପାଦନ କରିବ ଏବଂ ଏହା ସିଙ୍ଗାପୁର ଫୁଡ୍ ଏଜେନ୍ସିର ସୁରକ୍ଷା ପରୀକ୍ଷାରେ ମଧ୍ୟ ପାସ୍ କରିସାରିଛି । କମ୍ପାନୀ କହିଛି ଯେ ସିଙ୍ଗାପୁରରେ ଅନୁମୋଦନ ସହିତ ଭବିଷ୍ୟତ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯିବ ଯେଉଁଥିରେ ପଶୁମାନଙ୍କୁ ହତ୍ୟା ନକରି ମାଂସ ଉତ୍ପାଦନ କରାଯିବ । କମ୍ପାନୀ କହିଛି ଯେ ଲ୍ୟାବରେ ତିଆରି ହୋଇଥିବା ମାଂସରେ ପାରମ୍ପାରିକ ମାଂସ ଭଳି ପୁଷ୍ଟିକର ଖାଦ୍ୟ ରହିବ ଏବଂ ସ୍ୱାଦ ମଧ୍ୟ ସମାନ ହେବ ।
ପଶୁମାନଙ୍କୁ ହତ୍ୟା କରିବା ଦ୍ଵାରା ଜଳବାୟୁ ଏବଂ ପରିବେଶ ଉପରେ ପଡୁଥିବା କୁପ୍ରଭାବକୁ ରୋକିବାକୁ ଅନେକ ପ୍ରକାରର ସଂସ୍ଥା ଚିକେନ୍, ଗୋମାଂସ ଏବଂ ଘୁଷୁରି ମାଂସ ଆଡି ଲ୍ୟାବରେ ଉତ୍ପାଦନ କରୁଛନ୍ତି । କୌଣସି ହିଂସା ନକରି ସୁରକ୍ଷିତ ଏବଂ ଔଷଧ ମୁକ୍ତ ମାଂସ ଉତ୍ପାଦନ କରାଯାଇପାରିବ । ବର୍ତ୍ତମାନ ପ୍ରତିଦିନ ପ୍ରାୟ ୧୩ କୋଟି କୁକୁଡ଼ା ଏବଂ ୪୦ ଲକ୍ଷ ଘୁଷୁରିଙ୍କୁ ହତ୍ୟା କରାଯାଉଛି । ପୃଥିବୀର ସମୁଦାୟ ସ୍ତନ୍ୟପାୟୀ ପ୍ରାଣୀମାନଙ୍କ ମଧ୍ୟରେ ୬୦ ପ୍ରତିଶତ ପଶୁ, ୩୬ ପ୍ରତିଶତ ମଣିଷ ଏବଂ କେବଳ ୪ ପ୍ରତିଶତ ବଣୁଆ ଜନ୍ତୁ ଅଟନ୍ତି । କିନ୍ତୁ ମାଂସ ଖାଇବା ପାଇଁ ପଶୁମାନଙ୍କର ହତ୍ୟା ବାୟୋ-ସନ୍ତୁଳନକୁ ବିଗାଡ଼ି ଦେଉଛି ।
ଏବେ ପ୍ରଶ୍ନ ଉଠୁଛି ପଶୁମାନଙ୍କୁ ହତ୍ୟା ନକରି କିପରି ମାଂସ ଉତ୍ପାଦନ ହେବ । ବାସ୍ତବରେ, ଆମେରିକୀୟ କମ୍ପାନୀ ଜଷ୍ଟ ଇଟ୍ ୧୨୦୦ ଲିଟର ବାୟୋରାକ୍ଟରରେ ପଶୁ କୋଷ ପ୍ରସ୍ତୁତ କରିବ ଏବଂ ତା’ପରେ ଏହା ସହିତ ଜଡିତ ଉପାଦାନ ଯୋଗ କରିବ । ପ୍ରାରମ୍ଭରେ ଏହି ଉତ୍ପାଦର ଉପଲବ୍ଧତା ସୀମିତ ରହିବ । ତେବେ ଖୁବ ଶୀଘ୍ର ଏହାର ଉତ୍ପାଦ ସିଙ୍ଗାପୁରର ରେଷ୍ଟୁରାଣ୍ଟରେ ମଧ୍ୟ ବିକ୍ରି ହେବ ବୋଲି କମ୍ପାନୀ କହିଛି । ବୋଧହୁଏ, ଏହି ମାଂସ ପାରମ୍ପାରିକ ଚିକେନ୍ ଅପେକ୍ଷା ମହଙ୍ଗା ହେବ, କିନ୍ତୁ କମ୍ପାନୀ କହିଛି ଯେ ଉତ୍ପାଦନ ସ୍ତର ବଢାଇବା ସହିତ ଏହାର ମୂଲ୍ୟ ମଧ୍ୟ ହ୍ରାସ ପାଇବ ।
ଏହି ଉତ୍ପାଦ ତିଆରି କରିବା ପାଇଁ ଆବଶ୍ୟକ ପଶୁ କୋଷଗୁଡିକ ସେଲ୍ ବ୍ୟାଙ୍କରୁ ନିଆଯିବ କିମ୍ବା ଜୀବଜନ୍ତୁଙ୍କ ବାୟୋପସିରୁ ନିଆ ଯାଇପାରେ । କୋଷଗୁଡିକ ବଢାଇବା ପାଇଁ ଯାହା କିଛି ପୋଷକ ତତ୍ତ୍ୱ ବ୍ୟବହାର କରାଯିବ, ସେଗୁଡିକ ଉଦ୍ଭିଦରୁ ନିଆଯିବ । ଅନେକ ଅଧ୍ୟୟନରେ ଏହା ପ୍ରମାଣିତ ହୋଇଛି ଯେ ଧନୀ ଦେଶରେ ଲୋକମାନେ ଅତ୍ୟଧିକ ମାଂସ ଖାଇଥା’ନ୍ତି, ଯାହା ଉଭୟ ସ୍ୱାସ୍ଥ୍ୟ ଏବଂ ପୃଥିବୀ ପାଇଁ ବିପଦଜନକ । ବୈଜ୍ଞାନିକମାନେ କହିଛନ୍ତି ଯେ ପରିବେଶର ସୁରକ୍ଷା ପାଇଁ କୌଣସି ବ୍ୟକ୍ତିଙ୍କ ଦ୍ୱାରା ମାଂସ ବ୍ୟବହାର ହ୍ରାସ ହେବା ସବୁଠାରୁ ବଡ଼ ଅବଦାନ ।
ଏକ ରିପୋର୍ଟ ଅନୁଯାୟୀ ଜଷ୍ଟ ଇଟର ଜୋଶ ଟେଟ୍ରିକ୍ ଏହାକୁ ଖାଦ୍ୟ ଶିଳ୍ପ ପାଇଁ ଏକ ଐତିହାସିକ ପଦକ୍ଷେପ ବୋଲି କହିଛନ୍ତି । ଅନ୍ୟ ଦେଶଗୁଡିକର ନିୟାମକ ସଂସ୍ଥାଗୁଡ଼ିକର ଅନୁମୋଦନ ଗ୍ରହଣ କରିବା ଏବଂ ଉତ୍ପାଦନ ବୃଦ୍ଧି ଏକ ପ୍ରମୁଖ ଆହ୍ଵାନ ହେବ । ଯଦି ଆମେ ସମଗ୍ର ସିଙ୍ଗାପୁର ପାଇଁ ଉତ୍ପାଦନ ଆରମ୍ଭ କରିବା ଏବଂ ତା’ପରେ ଅନ୍ୟ ସ୍ଥାନରେ ମଧ୍ୟ ଆମର ଚେନ୍ ଖୋଲିବା, ତେବେ ଆମକୁ ୧୦,୦୦୦ ଲିଟର ବାୟୋରାକ୍ଟର କିମ୍ବା ୫୦,୦୦୦ ଲିଟରରୁ ଅଧିକ ବାୟୋରାକ୍ଟର ବ୍ୟବହାର କରିବାକୁ ପଡିବ ବୋଲି ସେ ଜଣେଇଛନ୍ତି ।
