ସଂସ୍କାର : ପଡ଼ୋଶୀଙ୍କୁ ଟଙ୍କା ଦେବା କାରଣରୁ ଉତ୍ତ୍ୟକ୍ତ ହୋଇ ନିଜ ପ୍ରେମିକାକୁ ହତ୍ୟା କରିବା ପରେ ମୃତଦେହକୁ ରେଳଟ୍ରାକରେ ଫୋପାଡ଼ିଦେଇଛି ପ୍ରେମିକ। ଏଭଳି ଚାଞ୍ଚଲ୍ୟକର ଘଟଣା ଘଟିଛି ଦକ୍ଷିଣ ଦିଲ୍ଲୀର ଗୋବିନ୍ଦପୁରୀ ଇଲାକାରେ । ଏହି ଘଟଣାରେ ପୋଲିସ ଜଣଙ୍କୁ ଗିରଫ କରିଛି । ଅଭିଯୁକ୍ତର ନାମ ଓମ ପ୍ରକାଶ (୪୩) ବୋଲି ଜଣାପଡ଼ିଛି । ହତ୍ୟା ପରେ ଅଭିଯୁକ୍ତ ଫେରାର ହୋଇଯାଇଥିଲା । କିନ୍ତୁ ପ୍ରମାଣ ନଷ୍ଟ କରିବା ପାଇଁ ପୁର୍ନବାର ଘରକୁ ଆସିଥିବାବେଳେ ପୋଲିସ ହାତରେ ଧରାପଡ଼ିଥିଲା ।
ପୋଲିସର ସୂଚନାନୁଯାୟୀ ଅଭିଯୁକ୍ତ ଓମ ତା’ ଭାଇ ସହିତଘରକୁ ଆସି ମହିଳାଙ୍କ ଶବ କାରରେ ନେଇଯାଇଥିଲା ଓ ଏହାକୁ ଗୌତମବୁଦ୍ଧ ନଗର ଜିଲ୍ଲାର ଦନକୌର ଇଲାକାରେ ଯମୁୁନା ଏକ୍ସପ୍ରେସୱେ ସ୍ଥିତ ସର୍ଭିସ ଲେନ ନିକଟରେ ଫୋପାଡ଼ିଦେଇଥିଲା । ପୋଲିସ ଏହି ଘଟଣାରେ ୩ ଅଭିଯୁକ୍ତକୁ ଗିରଫ କରିବା ସହିତ ଶବକୁ ଫୋପାଡ଼ିବା ପାଇଁ ବ୍ୟବହୃତ ସାମଗ୍ରୀଗୁଡ଼ିକୁ ମଧ୍ୟ ଜବତ କରିଛି ।
ଜୁଲାଇ ୨ ତାରିଖରେ ବ୍ରଜେଶ ନାମକ ଜଣେ ବ୍ୟକ୍ତି ପୋଲିସକୁ ତାଙ୍କର ଜଣେ ଭଡ଼ାଟିଆ ନିଖୋଜ ଥିବା ସୂଚନା ଦେଇଥିଲେ । ଏହି ଅଭିଯୋଗ କ୍ର୍ରମେ ପୋଲିସ ତାର ତଦନ୍ତ ଆରମ୍ଭ କରିଥିଲା ଓ ସିସିଟିଭି ଯାଞ୍ଚ ଆରମ୍ଭ କରିଥିଲା । ସିସିଟିଭି ଫୁଟେଜରୁ ୩ ଜଣ ବ୍ୟକ୍ତି ଜଣେ ମହିଳାଙ୍କ ଶବକୁ ନେଉଥିବାର ଭିଡ଼ିଓ ଜଣାପଡ଼ିଥିଲା । ପୋଲିସ ୩ଜଣଙ୍କ ମଧ୍ୟରୁ ୨ଜଣଙ୍କୁ ଚିହ୍ନଟ କରିଦେଇଥିଲା। ତୃତୀୟ ଜଣଙ୍କୁ ଚିହ୍ନଟ କରିପାରିନଥିଲା। ପରେ ତୁରନ୍ତ ଚଢାଉ ଆରମ୍ଭ ହୋଇଥିଲା । ପରେ ଓମପ୍ରକାଶର ସମ୍ପର୍କୀୟଙ୍କ ସୂଚନା ଆଧାରରେ ତାକୁ ଗିରଫ କରାଯାଇଥିଲା ।
