ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ଖବରରେ ସମଗ୍ର ଦେଶ ଦୁଃଖରେ ଭାଙ୍ଗି ପଡ଼ିଛି ଓ ଚକିତ ବି ହେଇଯାଇଛି । ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନିଙ୍କ ଜୀବନକୁ ନେଇ ନିର୍ମିତ ଫିଲ୍ମ ‘ଏମଏସ ଧୋନି : ଦ ଅନଟୋଲ୍ଡ ଷ୍ଟୋରୀ’ରେ ସୁଶାନ୍ତ ଧୋନିଙ୍କ ଭୂମିକାରେ ଅଭିନୟ କରି ଲକ୍ଷ ଲକ୍ଷ ଦର୍ଶକଙ୍କ ହୃଦୟ ଜିତିଥିଲେ । ଏଭଳି ପରିସ୍ଥିତିରେ ସମସ୍ତଙ୍କ ମନରେ ଏକ ପ୍ରଶ୍ନ ଉଠିଛି, ସୁଶାନ୍ତଙ୍କ ମୃତ୍ୟୁରେ ମହେନ୍ଦ୍ର ସିଂ ଧୋନି କ’ଣ ପ୍ରତିକ୍ରିୟା ଦେଇଛନ୍ତି !
ବ୍ୟବସାୟ ପରିଚାଳକ ଏବଂ ଧୋନିଙ୍କ ବନ୍ଧୁ ଅରୁଣ ପାଣ୍ଡେ କହିଛନ୍ତି ଯେ ସୁଶାନ୍ତଙ୍କ ମୃତ୍ୟୁ ଖବର ଶୁଣିବା ପରେ ଧୋନି ବହୁତ ଦୁଃଖିତ । ଏକ ନ୍ୟୁଜ୍ ଚ୍ୟାନେଲ ସହ କଥାବାର୍ତ୍ତା କରି ସେ କହିଛନ୍ତି, “ମୋତେ ବିଶ୍ୱାସ ହେଉନି ଯେ ଏମିତି କିଛି ହେଇଛି । ମୁଁ କୌଣସି ପ୍ରକାରେ ଦୁଃଖ ପ୍ରକାଶ କରିବା ସ୍ଥିତିରେ ନାହିଁ । ମାହି ମଧ୍ୟ ବହୁତ ବେଶୀ ଦୁଃଖୀ । ଏହା ଅତ୍ୟନ୍ତ ଦୁଃଖଦ ଘଟଣା ।”
୨୦୧୬ରେ ମହେନ୍ଦ୍ର ସିଂ ଧୋନିଙ୍କ ଜୀବନୀ ଉପରେ ଆଧାରିତ ଫିଲ୍ମ “ଏମଏସ ଧୋନି : ଦ ଅନଟୋଲ୍ଡ ଷ୍ଟୋରୀ” ମୁକ୍ତିଲାଭ କରିଥିଲା । ଏହି ଫିଲ୍ମରେ ଧୋନିଙ୍କ ଭୂମିକାରେ ଅଭିନୟ କରିବାକୁ ସୁଶାନ୍ତ ୯ ମାସ ଯାଏଁ ପୂର୍ବତନ ୱିକେଟକିପର କିରଣ ମୋରେଙ୍କ ସହ କ୍ରିକେଟ ତାଲିମ ନେଇଥିଲେ । ଏହି ଫିଲ୍ମକୁ ଦର୍ଶକଙ୍କ ଜବରଦସ୍ତ ପ୍ରତିକ୍ରିୟା ମିଳିଥିଲା ଓ ଏହା ବକ୍ସ ଅଫିସରେ ହିଟ୍ ମଧ୍ୟ ହୋଇଥିଲା । ସୂଚନାଯୋଗ୍ୟ ଯେ ସୁଶାନ୍ତ ସିଂଙ୍କ ପୋଷ୍ଟମର୍ଟମ ରିପୋର୍ଟ ଅନୁଯାୟୀ ସେ ଫାଶୀ ଦେଇ ନିଜେ ଆତ୍ମହତ୍ୟା କରିଥିଲେ ।
