ନୂଆବର୍ଷକୁ ପାଳନ କରିବା ଉଦ୍ଦେଶ୍ୟରେ ବଣଭୋଜି କରିବାକୁ ନିଜ ପରିବାର ସହିତ ସୁନ୍ଦରଗଡ଼ ଜିଲ୍ଲା ତଲସରା ଥାନା ଅନ୍ତର୍ଗତ ବାଲିଶଙ୍କରା ପଞ୍ଚାୟତ ଘୋଘର ଗାଁ ସ୍ଥିତ ଇବ୍ ନଦୀ ନିକଟ କନାକୁଣ୍ଡକୁ ଯାଇଥିଲେ ଯୁବତୀ । ସେଲଫି ନେଉ ନେଉ ଖସି ଗଲା ଗୋଡ଼ ଏବଂ ଚାହୁଁ ଚାହୁଁ ନଦୀର ପ୍ରଖର ସ୍ରୋତରେ ନିଖୋଜ ହୋଇଗଲେ କୁଆଡ଼େ । ମୁହୂର୍ତ୍ତକ ମଧ୍ୟରେ ଭୋଜି ମଉଜ ପାଲଟିଗଲା କାନ୍ଦବୋବାଳିରେ ।
ତେବେ ରାଜଗାଙ୍ଗପୁର ଅଞ୍ଚଳରୁ ନିଜ ପରିବାର ସାଙ୍ଗରେ ବଣଭୋଜି ପାଇଁ ଯାଇଥିବା ୨୭ ବର୍ଷୀୟ ଯୁବତୀ ଅନୁପମା ପ୍ରଜାପତିଙ୍କ ସହିତ ଘଟିଛି ଏହି ଅଭାବନୀୟ ଦୁର୍ଘଟଣା । ଅନୁପମା ଏବଂ ତାଙ୍କ ସାଙ୍ଗମାନେ ମିଶି ନଦୀରେ ଥିବା ସାତ ବଖରା ଦେଖିବାକୁ ଯାଇଥିଲେ । ଅନୁପମା ନିଜ ମୋବାଇଲରେ ସେଲ୍ଫି ନେଉଥିବା ସମୟରେ ଅସାବଧାନତା ଯୋଗୁ ନଦୀ ଭିିତରକୁ ଖସି ପଡ଼ିଥିଲେ ।
ଖବର ମିଳିବା ପରେ ବାପା, ମା’ ଓ ସାଙ୍ଗ ସାଥୀମାନେ ଘଟଣା ସ୍ଥଳକୁ ଦୌଡ଼ି ଆସିଥିଲେ । କାନ୍ଦବୋବାଳି ଆରମ୍ଭ ହୋଇ ଯାଇଥିବାବେଳେ ବାଲିଶଙ୍କରା ଅଗ୍ନିଶମ ବିଭାଗକୁ ସୂଚନା ମଧ୍ୟ ଦିଆଯାଇଥିଲା । ତେବେ ସୂଚନାଥାଉ ଯେ ନିଖୋଜ ଅନୁପମାଙ୍କ ନିର୍ବନ୍ଧ ହୋଇଥିବା ବେଳେ ଆସନ୍ତା ଫେବୃଆରୀ ମାସ ୧୬ ତାରିଖରେ ବିବାହ ହେବାର ଥିଲା ।
