ସୁଶାନ୍ତ ସିଂ ରାଜପୁତ୍ ରବିବାର ଦିନ ନିଜ ଘରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି ଯାହା କେବଳ ବଲିଉଡ୍ ଇଣ୍ଡଷ୍ଟ୍ରି ନୁହେଁ ସାରା ଦେଶବାସୀଙ୍କୁ ଶୋକାକୁଳ ପରିବେଶ ଆଣିଦେଇଛି । ମାତ୍ର ୩୪ ବର୍ଷ ବୟସରେ ସୁଶାନ୍ତଙ୍କ ବିୟୋଗ ତାଙ୍କ ପ୍ରଶଂସକଙ୍କ ପାଇଁ ବିଶ୍ଵାସଯୋଗ୍ୟ ନୁହେଁ । ମିଡ଼ିଆ ରିପୋର୍ଟ ଅନୁଯାୟୀ ସୁଶାନ୍ତ ସିଂ ଗତ କେତେ ମାସ ଧରି ଡିପ୍ରେସନର ଶିକାର ଥିଲେ । ହେଲେ ସୋସିଆଲ ମିଡ଼ିଆରେ ସୁଶାନ୍ତଙ୍କ ପ୍ରଶଂସକମାନେ ପ୍ରଶ୍ନ କରୁଛନ୍ତି ଯେ ସୁଶାନ୍ତ ସିଂଙ୍କ ଆତ୍ମହତ୍ୟା ପାଇଁ ଦାୟୀ କିଏ ? କରନ ଜୋହର, ଆଲିଆ ଭଟ୍ଟଙ୍କ ପରେ ସଲମାନ ଖାନଙ୍କ ଉପରେ ଲୋକଙ୍କ ରାଗ ଏବେ ଘନେଇବାରେ ଲାଗିଛି ।
ବର୍ତ୍ତମାନ ସୋସିଆଲ ମିଡ଼ିଆ ଟ୍ୱିଟରରେ ଶୀର୍ଷରେ ଟ୍ରେଣ୍ଡ କରୁଛନ୍ତି ସଲମାନ ଖାନ । ଜୁନ ୧୪ରେ ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ଖବର ଆସିବା ପରେ ବଲିଉଡରୁ ଆରମ୍ଭ କରି ରାଜନୈତିକ ଏବଂ କ୍ରୀଡାଜଗତ ପର୍ଯ୍ୟନ୍ତ ସମସ୍ତେ ତାଙ୍କ ମୃତ୍ୟୁରେ ଶୋକ ପ୍ରକାଶ କରିଥିଲେ । ଏହି କ୍ରମରେ ସଲମାନ ଖାନ ମଧ୍ୟ ନିଜ ଟ୍ୱିଟରରେ ସୁଶାନ୍ତଙ୍କ ମୃତ୍ୟୁରେ ତାଙ୍କ ଆତ୍ମାର ଶାନ୍ତି ପାଇଁ ପ୍ରାର୍ଥନା କରିଥିଲେ ।
ଜ୍ୟାକଲିନ ଫର୍ଣ୍ଣାଣ୍ଡିସ ଏବଂ ସୁଶାନ୍ତ ସିଂ ରାଜପୁତଙ୍କ ସହ ଫିଲ୍ମ କରୁଛନ୍ତି କି ବୋଲି ସଲମାନ ଖାନଙ୍କୁ ପଚରା ଯାଇଥିଲା ହେଲେ ସଲୁ ମିଆଁଙ୍କ ଉତ୍ତର ଥିଲା, ସୁଶାନ୍ତ ସିଂ ରାଜପୁତ କିଏ ? ପରେ ସଲମାନଙ୍କୁ କୁହାଯାଇଥିଲା ଯେ ମହେନ୍ଦ୍ର ସିଂ ଧୋନି ଭୂମିକାରେ ଅଭିନୟ କରିଥିବା ‘MS ଧୋନି ଦ ଅନଟୋଲ୍ଡ ଷ୍ଟୋରୀ’ର ହିରୋ ହେଉଛନ୍ତି ସୁଶାନ୍ତ ସିଂ । ବର୍ତ୍ତମାନ ଟ୍ୱିଟରରେ ସଲମାନ ଖାନ ଏହି ପ୍ରଶ୍ନ ଓ ନିଜ ଉତ୍ତରକୁ ନେଇ ଟ୍ରେଣ୍ଡ ହେଉଛନ୍ତି ।
ସଲମାନ ଖାନଙ୍କ ଏହି ପୁରୁଣା ସାକ୍ଷାତକାରରେ ସୁଶାନ୍ତ ସିଂ ରାଜପୁତଙ୍କ ପ୍ରଶଂସକଙ୍କ କ୍ରୋଧ ସୋସିଆଲ ମିଡ଼ିଆରେ ନିଆଁ ଭଳି ବ୍ୟାପିବାରେ ଲାଗିଛି । ସଲମାନ ଖାନଙ୍କ ପୂର୍ବରୁ ଟ୍ୱିଟର ବ୍ୟବହାରକାରୀମାନେ କରନ ଜୋହର ଏବଂ ଆଲିଆ ଭଟ୍ଟଙ୍କ ବିପକ୍ଷରେ ବି ସ୍ଵର ଉଠାଇଛନ୍ତି ।
ଅନ୍ୟପକ୍ଷରେ ସଲମାନ ଖାନଙ୍କ ପ୍ରଶଂସକମାନେ ସଲମାନ ସମର୍ଥନରେ ଟ୍ୱିଟ କରୁଛନ୍ତି । ସେମାନେ କହିଛନ୍ତି ଯେ ସଲମାନ ସମସ୍ତଙ୍କୁ ସମର୍ଥନ କରିଛନ୍ତି । ଏମିତିକି ସୁଶାନ୍ତ ସିଂ ଏବଂ ସଲମାନ ଖାନଙ୍କ ଏକ ଡ୍ୟାନ୍ସ ଭିଡ଼ିଓ ମଧ୍ୟ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଲୋକମାନେ ଏହା ମଧ୍ୟ କହୁଛନ୍ତି ଯେ ଯେତେବେଳେ ବିଗ୍ ବସ୍ ସମୟରେ ସୁଶାନ୍ତ ସିଂ ରାଜପୁତ ଏବଂ ସାରା ଅଲି ଖାନ୍ ‘କେଦାରନାଥ’ର ପ୍ରମୋସନ ପାଇଁ ପହଞ୍ଚିଥିଲେ, ସେତେବେଳେ ସଲମାନ ଖାନ ଉଭୟଙ୍କ ସହିତ ବହୁତ ଭଲ ବ୍ୟବହାର କରିଥିଲେ । କେବଳ ଏତିକି ନୁହେଁ, ସଲମାନ ସୁଶାନ୍ତଙ୍କୁ ‘କେଦାରନାଥ’ ପାଇଁ ଶୁଭେଚ୍ଛା ମଧ୍ୟ ଦେଇଥିଲେ ।
