ସଂସ୍କାର : ସବୁବେଳେ ଚର୍ଚ୍ଚା ଆଉ ଗଣମାଧ୍ୟମ ସାମ୍ନାରେ ରହିବାକୁ ପସନ୍ଦ କରନ୍ତି ଓଲିଉଡ୍ ଅଭିନେତ୍ରୀ ପ୍ରକୃତି ମିଶ୍ର। ଜଣେ ଶିଶୁ କଳାକାରରୁ ନିଜର ଫିଲ୍ମ କ୍ୟାରିୟର ଆରମ୍ଭ କରିଥିବା ପ୍ରକୃତି ମିଶ୍ର, ବର୍ତ୍ତମାନ ଓଲିଉଡ୍ ସହିତ ବଲିଉଡରେ ବି ପାଦ ଦେଲେଣି। ଏହି ସବୁ ମଧ୍ୟରେ ସେ ପୁଣି ଚର୍ଚ୍ଚା ପରିସରକୁ ଆସିଛନ୍ତି।
ଦେଶର ସବୁଠୁ ଚର୍ଚ୍ଚିତ ରିଅଲିଟି ଶୋ’ ବିଗ୍ ବସ୍ରେ ପ୍ରକୃତି ନଜର ଆସିବା ନେଇ ଚାଲିଛି ଖୁବ୍ ଚର୍ଚ୍ଚା। ସେ ବଲିଉଡ୍ ଭାଇଜାନ୍ ସଲମାନ ଖାନଙ୍କ ସହିତ ମିଶି କାମ କରିବେ ବୋଲି ଆଲୋଚନା ଜୋର ଧରିଛି। ଜୁଲାଇ 23 ତାରିଖରୁ ଓଲିଉଡ୍ ଅଭିନେତା ବାବୁସାନ ମହାନ୍ତିଙ୍କୁ ନେଇ ବିବାଦରେ ଥିବା ଅଭିନେତ୍ରୀ ପ୍ରକୃତି ମିଶ୍ରଙ୍କୁ ବର୍ତ୍ତମାନ ଏହି ବଡ଼ ସୁଯୋଗ ମିଳିବାକୁ ଯାଉଥିବା ରାଜ୍ୟ ଆଉ ଜାତୀୟ ଗଣମାଧ୍ୟମ ସୁତ୍ରରୁ ଜଣାପଡ଼ିଛି।
ଅନ୍ୟପଟେ ଆସନ୍ତା ଅକ୍ଟୋବର ୧ ତାରିଖରୁ ବିଗ୍ ବସର ସିଜିନ-୧୬ ଆରମ୍ଭ ହେବାକୁ ଥିବା ବେଳେ ଏଥିରେ ପ୍ରତିଯୋଗୀ ଭାବେ ନଜର ଆସିବେ ପ୍ରକୃତି। ବଲିଉଡର ଖବର ପ୍ରକାଶ କରୁଥିବା ୱେବସାଇଟ୍ ‘ଫିଲ୍ମିବିଟ୍’ ଏଭଳି ଏକ ଖବର ପ୍ରକାଶ କରିଛି। ପ୍ରକୃତିଙ୍କୁ ବିଗ୍ ବସରେ ସୁଯୋଗ ମିଳୁଥିବା ନେଇ ଚର୍ଚ୍ଚା ହେଉଛି ବୋଲି ଉକ୍ତ ୱେବସାଇଟ୍ କହିଛି। ଏହି କଥା ଏବେ ମୁମ୍ବାଇରୁ ଆସି ଓଲିଉଡ୍ରେ ପହଞ୍ଚିଛି।
ନିକଟରେ ହୋଇଥିବା ବାବୁଶାନଙ୍କ ପତ୍ନୀଙ୍କ ସହ ବିବାଦ ପ୍ରକୃତିଙ୍କୁ ବିଗ୍ ବସର ଟିକେଟ ଦେଇଥିବା ନେଇ ଚର୍ଚ୍ଚା ଆରମ୍ଭ ହୋଇଛି। ତେବେ ପ୍ରକୃତିଙ୍କୁ ବିଗ୍ ବସରେ ସୁଯୋଗ ମିଳିଛି କି ନାହିଁ, ତାହା ବିଗବସ୍ ରିୟାଲିଟି ଶୋ’ର ଚୂଡ଼ାନ୍ତ ପ୍ରତିଯୋଗୀ ତାଲିକା ଆସିଲେ ହିଁ ଜଣାପଡ଼ିବ। ସେହିପରି ପ୍ରତି ଥର ଭଳି ଚଳିତ ବର୍ଷ ବି ସଲମାନ ଏହି ଶୋ’ କୁ ହୋଷ୍ଟ କରିବେ। ଆଉ ସବୁ ଦାୟିତ୍ୱ ନେବେ। ଯେଉଁଥିପାଇଁ ସେ ପାଖପାଖି 100 କୋଟି ଟଙ୍କା ପ୍ରାପ୍ୟ ମାଗିଥିବା ଜଣାପଡିଛି।
