କରୋନା କଟକଣା ଓ ଲକଡାଉନ ଯୋଗୁ ଅନେକେ ନିଜ ଘରଠାରୁ ଦୂରରେ ଫସି ରହିଛନ୍ତି । ବଲିଉଡର ସୁପରଷ୍ଟାର ସଲମାନ ଖାନ ମଧ୍ୟ ଗତ କେଇ ମାସ ହେବ ପନବେଲରେ ଥିବା ତାଙ୍କ ଫାର୍ମହାଉସରେ ଅଟକ ଅଛନ୍ତି । ତେବେ ସେ ଭିଡ଼ିଓ ମାଧ୍ୟମରେ ସରକାରଙ୍କ ନିୟମ ମାନନ୍ତୁ ଓ ଯେଉଁଠି ଅଛନ୍ତି ସେଇଠି ରୁହନ୍ତୁ ବୋଲି ନିବେଦନ କରିଛନ୍ତି । ସଲୁ ମିଆଁଙ୍କ ପ୍ରବାସୀଙ୍କୁ ସହଯୋଗର ହାତ ବଢାଇବା ଭିଡ଼ିଓ ବି ବେଶ ଚର୍ଚ୍ଚାକୁ ଆସିଥିଲା । ଏବେ କିନ୍ତୁ ସେ ଧାନ ଚାଷ କରୁଥିବା ନଜର ଆସିଛନ୍ତି ଯାହା ଭାଇରାଲ ହେବାରେ ଲାଗିଛି ।
ଚାଷ ଜମିକୁ ଓହ୍ଲାଇ ନିଜେ ଧାନ ରୋଇବା ଓ ପରେ ହାତ-ମୁହଁ ଧୋଇ ହେବା ଭିଡ଼ିଓରେ ସ୍ପଷ୍ଟ ଦିଶୁଚି । ସଲମାନ ଭିଡ଼ିଓ କ୍ୟାପସନରେ ଲେଖିଛନ୍ତି ଯେ ଧାନ ଚାଷ ସରିଛି । ଏ ଭିଡ଼ିଓ ସୋସିଆଲ ମିଡ଼ିଆ ଇନଷ୍ଟାରେ ଘୁରି ବୁଲିବାବେଳେ ସଲମାନଙ୍କ ପ୍ରଶଂସକ ତାଙ୍କର ଏ କାମକୁ ବହୁତ ପ୍ରଶଂସା କରିବା ଦେଖିବାକୁ ମିଳିଛି । ଜଣେ ପ୍ରଶଂସକ ତ ଏହି ଭିଡ଼ିଓରେ ପ୍ରତିକ୍ରିୟା କରି ଲେଖିଛନ୍ତି – ମାଶାଲ୍ଲାହ ଭାଇଜାନ୍ । ୧୪ ଘଣ୍ଟା ଭିତରେ ଏ ଭିଡ଼ିଓକୁ ୩୦ ଲକ୍ଷରୁ ଅଧିକ ଲୋକ ଦେଖି ସାରିଲେଣି ।
