ସମଗ୍ର ବିଶ୍ୱରେ କରୋନା ଭାଇରସର ତାଣ୍ଡବ ଚାଲିଥିଲା ବେଳେ ଲୋକଙ୍କ ମନରେ ବି କରୋନା ସଂକ୍ରମଣ ପ୍ରତି ଭୟ ବଢି ବଢି ଚାଲିଛି । ଭୟ ଏତେ ପ୍ରଗାଢ ଯେ କେହି ଜଣେ ଆତ୍ମୀୟ କରୋନାରେ ପ୍ରାଣ ହରାଇଲା ପରେ ତା ନିଜ ସହୋଦର କି ସମ୍ପର୍କୀୟ କଥା ଛାଡ଼ ତା ସମାଜର ଲୋକ ବି ତା ପାଖ ମାଡୁ ନାହାନ୍ତି । ହେଲେ ଏ ସମୟରେ ଦୃଷ୍ଟାନ୍ତ ହେଇ ଠିଆ ହୋଇଛନ୍ତି ଶତ୍ରୁ ବୋଲାଉଥିବା ମୁସଲିମ ଲୋକ ।
ଆଜ୍ଞା ହଁ, ଏମିତି ଏକ ମାମଲା ସାମ୍ନାକୁ ଆସିଛି ପାଟନାର ଗୟା ଜିଲ୍ଲାର ଇମାମଂଗଜ ବ୍ଲକ ଅନ୍ତର୍ଗତ ରାନିଗଞ୍ଜ ପଞ୍ଚାୟତର ତେତରିଆ ଗାଁରୁ । ଚାଲିଥିବା କରୋନାର ଦ୍ଵିତୀୟ ତରଙ୍ଗରେ ମୁସଲମାନ ସମାଜର କିଛି ଲୋକ ଜଣେ ହିନ୍ଦୁ ମହିଳାଙ୍କୁ କାନ୍ଧ ଦେଇ କରିଥିଲେ ତାଙ୍କ ଶବ ସତ୍କାର । ବର୍ତ୍ତମାନ ଏହାର ଏକ ଭିଡ଼ିଓ ଏବଂ ଫଟୋ ସୋସିଆଲ ମିଡ଼ିଆରେ ପ୍ରଚୁର ଭାବେ ଭାଇରାଲ ହେବାରେ ଲାଗିଛି ।
ଭିଡ଼ିଓଟି ଦେଖି ୟୁଜର୍ସମାନେ କହିଛନ୍ତି ଯେ ଏହା ହିନ୍ଦୁ-ମୁସଲମାନ ଏକତାର ଏକ ଉଦାହରଣ । ରାମ ନାମ ହେଉଛି ସତ୍ୟ…। ଅନ୍ତିମ ସଂସ୍କାର ସମୟରେ ହିନ୍ଦୁ ସମାଜରେ ଶୁଣିବାକୁ ମିଳେ ଯେ ‘ରାମ ନାମ ସତ୍ୟ’ ଯାହାକୁ ଏଠାରେ ସମସ୍ତ ମୁସଲମାନ ଯୁବକମାନେ କହୁଥିଲେ । ଜାଣିବାକୁ ମିଳିଛି ଯେ ମୃତ ମହିଳା ଜଣଙ୍କ ୫୮ ବର୍ଷୀୟ ପ୍ରଭାବତୀ ଦେବୀ ।
ଏହି ପରିପ୍ରେକ୍ଷୀରେ, ମଗଧ ବ୍ୟବସାୟୀଙ୍କ ମାଲିକ ବିଜେପି ସାମାଜିକ କାର୍ଯ୍ୟକର୍ତ୍ତା ଅବଧେଶ ପ୍ରସାଦ କହିଛନ୍ତି ଯେ ରାନିଗଞ୍ଜ ପଞ୍ଚାୟତର ତେତରିଆ ଗାଁର ଜଣେ ମହିଳା କିଛି ଦିନ ପୂର୍ବେ ଅସୁସ୍ଥ ହୋଇପଡ଼ିଥିଲେ । ସେ ରାନିଗଞ୍ଜର ଏକ ଘରୋଇ ଡାକ୍ତରଖାନାରେ ଚିକିତ୍ସିତ ହେଉଥିଲେ । ହଠାତ୍ ତାଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହେବାରୁ ଡାକ୍ତର ତାଙ୍କୁ କରୋନା ଯାଞ୍ଚ କରିବାକୁ ପରାମର୍ଶ ଦେଇଥିଲେ ଏବଂ ତାପରେ ତାଙ୍କୁ ପରିବାର ଲୋକେ ଇମାମଗଞ୍ଜ କମ୍ୟୁନିଟି ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲେ । କରୋନା ରିପୋର୍ଟ ନେଗେଟିଭ୍ ବାହାରିବାରୁ ପରିଜନ ତାଙ୍କୁ ଘରକୁ ନେବାକୁ କହିଥିଲେ ଡାକ୍ତର । ହେଲେ ଘରକୁ ନେବା ରାସ୍ତାରେ ହିଁ ତାଙ୍କର ମୃତ୍ୟୁ ହୋଇଗଲା ।
ତେବେ ପରିଜନ କରୋନା ଭୟରେ ମୃତ ମହିଳାଙ୍କୁ କାର ଭିତରେ ହିଁ ଛାଡ଼ି ଦେଇ ଚାଲିଗଲେ । ମହିଳାଙ୍କ ମୃତଦେହଟି ମଧ୍ୟାହ୍ନରୁ ରାତି ୮ ଟା ପର୍ଯ୍ୟନ୍ତ ସେଇମିତି କାର ଭିତରେ ପଡ଼ି ରହିଥିଲା । ଯେତେବେଳେ ମୁସଲମାନ ସମାଜର ଲୋକମାନେ ଏହା ଜାଣିଲେ, ସେମାନେ ପରିବାରକୁ ସାନ୍ତ୍ୱନା ଦେବାକୁ ଆସିଥିଲେ ଏବଂ କାରରୁ କାଢି ମୃତକଙ୍କ ପାଇଁ କୋକେଇ ତିଆରି କଲେ । ରାମ ନାମ ସତ୍ୟ କହି ତାଙ୍କ ଅନ୍ତିମ ସଂସ୍କାର କଲେ । ଶେଷରେ ଶବ ଦାହ ବେଳେ ମୃତକ ମହିଳାଙ୍କ ସ୍ଵାମୀ ଦିଗବିଜୟ ପ୍ରସାଦ, ପୁଅ ନିର୍ବାଣ କୁମାର ଏବଂ ବିକାଶ ଆସି ପହଞ୍ଚିଥିଲେ । ମୃତଦେହକୁ ମୃତକଙ୍କ ପୁଅ ଏବଂ ମୁସଲମାନ ସମାଜର ଯୁବକ ମିଶି ତାଙ୍କ ଶବ ଦାହ କରିଛନ୍ତି ।
