ମାତ୍ର କେଇଟା ଦିନରେ ଦର୍ଶକଙ୍କ ମନ ଜିତି ଅନେକ ପ୍ରଶଂସା ଗୋଟେଇ ପାରିଥିବା ବଲିଉଡ୍ ଅଭିନେତା ସୁଶାନ୍ତ ସିଂହ ରାଜପୁତ୍ ଆତ୍ମହତ୍ୟା ସାରା ବଲିଉଡ୍ ଇଣ୍ଡଷ୍ଟ୍ରିକୁ ଦୋହଲାଇ ଦେଇଛି । ମୁମ୍ବାଇରେ ନିଜ ଘରେ ଫାଶି ଲଗାଇ ସେ ଜୀବନ ଦୀପକୁ ଲିଭାଇ ଦେଇଛନ୍ତି ନିଜ ହାତରେ । ଏ ସୂଚନା ମିଳିବା ପରେ ସିନେ ପ୍ରେମୀମାନେ ବିଶ୍ୱାସ କରି ପାରିନଥିଲେ ଏ ଖବରକୁ । ସମସ୍ତଙ୍କ ମୁହଁରେ ଗୋଟିଏ ପ୍ରଶ୍ନ, ସୁଶାନ୍ତଙ୍କ କ’ଣ ଏମିତି ଘଟିଲା ଯେ ତାଙ୍କୁ ଏପରି ଚରମ ପଦକ୍ଷେପ ନେବାକୁ ପଡ଼ିଲା !
ସ୍ୱଳ୍ପ ସମୟ ଅବଧିରେ ସୁଶାନ୍ତ ସିଂହ ରାଜପୁତ୍ ହିଁ ଥିଲେ ଯିଏ ଅନେକ ସଫଳତା ହାସଲ କରିବା ସହିତ ଜହ୍ନରେ ଜମି ଖଣ୍ଡେ କିଣିଥିଲେ । ଜହ୍ନରେ ଜମି କିଣିବାରେ ସେ ପ୍ରଥମ ବ୍ୟକ୍ତି ନୁହନ୍ତି, ଅବଶ୍ୟ ତାଙ୍କ ପୂର୍ବରୁ ଶାହରୁଖ ଖାନ୍ ବି ଏ ଦିଗରେ ପାଦେ ଆଗେଇଥିଲେ ଯଦିଓ ତାଙ୍କର ଜଣେ ଫ୍ୟାନ୍ ଉପହାର ଆକାରରେ ଦେଇଥିଲେ ।
ସୁଶାନ୍ତ ରାଜପୁତ୍ ଜହ୍ନରେ କିଣିଥିବା ଜାଗାର ନାଁ ‘ମାରେ ମସ୍କୋୱିନ୍ସ’ । ସୂଚନା ମିଳିଛି ଯେ ତାଙ୍କ ପାଖରେ ପ୍ରଥମରୁ ହିଁ ଏକ ଆଡ୍ଭାନ୍ସ ଟେଲିସ୍କୋପ ମିଡ୧୪, LX00 ଥିଲା ଯଦ୍ୱାରା ସେ ପୃଥିବୀରୁ ଥାଇ ଜହ୍ନରେ କିଣିଥିବା ତାଙ୍କ ଜାଗା ଉପରେ ନଜର ରଖିଥିଲେ । ୨୦୧୮ ଜୁନ୍ ୨୫ ତାରିଖରେ ସେ ଇଣ୍ଟରନାଶନାଲ ଲୁନର ଲ୍ୟାଣ୍ଡସ୍ ରେଜିଷ୍ଟ୍ରିରୁ ଏହାକୁ କିଣିଥିଲେ ।
ଅନ୍ତର୍ଜାତୀୟ ସର୍ତ୍ତ ଓ ଆଇନ ଅନୁଯାୟୀ ଜହ୍ନରେ କିଣିଥିବା ଜାଗାରେ କିଣିଥିବା ବ୍ୟକ୍ତିର କୌଣସି ମାଲିକାନା ରହିବନି । ତେବେ ସୁଶାନ୍ତ ନିଜ ଘରୁ ଟେଲିସ୍କୋପ ମାଧ୍ୟମରେ ଭିନ୍ନ ଭିନ୍ନ ଗ୍ରହ, ନକ୍ଷତ୍ରପୁଞ୍ଜ ଏବଂ ଗାଲାକ୍ସିକୁ ଅନୁଧ୍ୟାନ ବି କରୁଥିଲେ ଏବଂ ଟେଲିସ୍କୋପକୁ ସେ ଟାଇମ୍ ମେଶିନ ବୋଲି କହୁଥିଲେ ।
