ସଂସ୍କାର : ଝୁଲନ୍ତା ଅବସ୍ଥାରେ ଯୁବକଙ୍କ ମୃତଦେହ ଉଦ୍ଧାର। ଭଦ୍ରକ ଟାଉନ୍ରେ ଥିବା ସ୍ୱାଗତମ ହୋଟେଲରୁ ଠାବ ହୋଇଛି ମୃତଦେହ। ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଖବର ଅନୁଯାୟୀ, ଭଦ୍ରକ ଗ୍ରାମାଞ୍ଚଳ ଥାନା କଲେଇ ଗାଁର ଅରୁଣ ସାହୁ ନାମକ ଯୁବକ କଲିକତାରେ ରହି କାର୍ଯ୍ୟ କରୁଥିଲେ। ତେବେ ଗତ ଚାରିମାସ ପୂର୍ବରୁ ଭଦ୍ରକ ଫେରିଥିଲେ।
କିନ୍ତୁ ସେ ଘରକୁ ନଯାଇ ହୋଟେଲ ସ୍ୱାଗତମ୍ରେ ରହିଆସୁଥିଲେ। ଶନିବାର ଅପରାହ୍ନରେ ହୋଟେଲ କର୍ମଚାରୀ ଅରୁଣଙ୍କୁ ଖାଇବା ଦେବାକୁ ଆସିଥିଲେ। କିନ୍ତୁ ଅନେକ ଥର ଡାକିବା ପରେ ବି କୌଣସି ଉତ୍ତର ପାଇନଥିଲେ କର୍ମଚାରୀ । ଶେଷରେ ହୋଟେଲ କର୍ମଚାରୀ ସନ୍ଦେହ ହେବାରୁ ପୋଲିସକୁ ଖବର ଦେଇଥିଲେ ।
ପୋଲିସ ଉପସ୍ଥିତିରେ କବାଟ ଭଙ୍ଗାଯାଇ ଅରୁଣଙ୍କ ମୃତଦେହ ଉଦ୍ଧାର କରାଯାଇଥିଲା । ଘର ଭିତରେ ଝୁଲନ୍ତା ଅବସ୍ଥାରେ ମୃତଦେହ ରହିଥିଲା । ପୋଲିସ ତୁରନ୍ତ ସାଇଣ୍ଟିଫିକ୍ ଟିମ୍ ଉପସ୍ଥିତିରେ ମୃତ ଶରୀରକୁ ତଳକୁ ଓହ୍ଲାଇଥିଲା। ଏହାପରେ ମୃତଦେହକୁ ଶବ ବ୍ୟବଚ୍ଥେଦ ପାଇଁ ନିକଟସ୍ଥ ଡାକ୍ତରଖାନାକୁ ପଠାଇଥିଲା।ଘଟଣାସ୍ଥଳରେ ତଥ୍ୟ ଯୋଗାଡ଼ କରି ତଦନ୍ତ ଜାରି ରଖିଛି ପୋଲିସ। ତେବେ ଯୁବକ ଜଣକ କାହିଁକି ଆତ୍ମହତ୍ୟା କଲେ ତାହାର କାରଣ ଏପର୍ଯ୍ୟନ୍ତ ଜଣାପଡିନି।
