ସଂସ୍କାର : ଦେଶରେ ଚାଲିଛି ନିର୍ବାଚନୀ ମାହୋଲ। ଗୋଟିଏପଟେ ଆମ ରାଜ୍ୟର ପଞ୍ଚାୟତ ନିର୍ବାଚନକୁ ନେଇ ଚଳଚଞ୍ଚଳ ଥିବା ବେଳେ, ଅନ୍ୟପଟେ ଉତ୍ତରପ୍ରଦେଶ , ଉତ୍ତରାଖଣ୍ଡ ଏବଂ ଗୋଆରେ ନିର୍ବାଚନ ପାଇଁ ମତଦାନ ଆରମ୍ଭ ହୋଇ ସାରିଛି। ତେବେ ଏହି ନିର୍ବାଚନ ମାହୋଲ ମଧ୍ୟରେ ଜଣେ ବ୍ୟକ୍ତି ବର୍ତ୍ତମାନ ସୋସିଆଲ ମିଡ଼ିଆରେ ଭାଇରାଲ ହୋଇଛନ୍ତି। ଆଉ ଏହି ବ୍ୟକ୍ତି ଜଣକ ଉତ୍ତରପ୍ରଦେଶର ବୋଲି ଜଣାପଡିଛି। ସେ ଭାଇରାଲ ହେବା ପଛର କାରଣ ହେଉଛି ନିର୍ବାଚନ ଲଢ଼ିବା।
ୟୁପିର ଏହି ବ୍ୟକ୍ତି ନିଜ ଜୀବନ କାଳ ମଧ୍ୟରେ ୯୩ ଥର ନିର୍ବାଚନ ଲଢି ସାରିଲେଣି। ଆଉ ବର୍ତ୍ତମାନ ସେ ଚଳିତ ବର୍ଷ ୯୪ ତମ ନିର୍ବାଚନ ଲଢ଼ିବାକୁ ଯାଉଛନ୍ତି। ସେ ଚଳିତ ବର୍ଷ ବି ନିଜର ନାମାଙ୍କନ ପତ୍ର ଦାଖଲ କରିଛନ୍ତି।ତେବେ ସବୁଠାରୁ ଆଶ୍ଚର୍ଯ୍ୟର୍ ବିଷୟ ଏହା ଯେ, ସେ ଏତେଥର ନିର୍ବାଚନ ଲଢ଼ି ବି କେବେ ବି ଜିତି ନାହାନ୍ତି। ଏହି ବ୍ୟକ୍ତି ଆଗ୍ରାର ବୋଲି ଯାହା ଜାତୀୟ ଗଣମାଧ୍ୟମ ସୂତ୍ରରୁ ଜଣାପଡ଼ିଛି।
ବାସ୍ତବରେ, ଉତ୍ତରପ୍ରଦେଶର ଆଗ୍ରାରେ ରହୁଥିବା ଏହି ବ୍ୟକ୍ତିଙ୍କ ନାମ ହେଉଛି ହସନୁରାମ ଆମ୍ବେଦକର। ଇଣ୍ଡିଆ ଟୁଡେରେ ଏକ ଅନଲାଇନ୍ ରିପୋର୍ଟ ଅନୁଯାୟୀ, ଏଥର ସେ ଆଗ୍ରା ଜିଲ୍ଲାର ଖେରଗଡ ବିଧାନସଭାର ନିର୍ବାଚନରେ ନିଜ ଭାଗ୍ୟ ପରୀକ୍ଷା କରିବାକୁ ଚେଷ୍ଟା କରିଛନ୍ତି। ହସନୁରାମ ଏପର୍ଯ୍ୟନ୍ତ ୯୩ ଟି ନିର୍ବାଚନରେ ହାରିଛନ୍ତି, ଏହା ତାଙ୍କର ୯୪ ତମ ନିର୍ବାଚନ ହେବ। ଏମିତିକି ରାଷ୍ଟ୍ରପତି ପଦ ପାଇଁ ହସନୁରାମ ମଧ୍ୟ ମନୋନୀତ ହୋଇଛନ୍ତି, ଯଦିଓ ସେତେବେଳେ ତାଙ୍କ ନାମାଙ୍କନପତ୍ର ପ୍ରତ୍ୟାଖ୍ୟାନ କରାଯାଇଥିଲା।
ରିପୋର୍ଟ ଅନୁଯାୟୀ, ହସନୁରାମ ଗ୍ରାମପଞ୍ଚାୟତର ସରପଞ୍ଚ ପଦ ଠାରୁ ଆରମ୍ଭ କରି ସାଂସଦ, ବିଧାୟକ, ଏମଏଲସି ପଦ ପର୍ଯ୍ୟନ୍ତ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଛନ୍ତି। କେବଳ ଏତିକି ନୁହେଁ, ହସନୋରାମ ମଧ୍ୟ ୧୯୮୮ ମସିହାରେ ରାଷ୍ଟ୍ରପତି ପଦ ପାଇଁ ଆବେଦନ କରିଥିଲେ, କିନ୍ତୁ ତାଙ୍କ ଫର୍ମ ପ୍ରତ୍ୟାଖ୍ୟାନ କରାଯାଇଥିଲା। ଏସମ୍ପର୍କରେ ୭୬ ବର୍ଷୀୟ ହାସନୁରାମ କହିଛନ୍ତି ଯେ, ମୁଁ ଯେତେ ଦିନ ବଞ୍ଚିବି, ମୁଁ ନିର୍ବାଚନ ଲଢିବି। ଏଥର ମୁଁ ମୋର ୯୪ ତମ ନିର୍ବାଚନ ପ୍ରତିଦ୍ୱନ୍ଦ୍ୱିତା କରୁଛି।
ହସନୋରାମ କହିଛନ୍ତି ଯେ ୧୯୮୪ ମସିହାରେ ସେ ଲକ୍ଷ୍ନୌରେ ଜଣେ ବିଧାୟକଙ୍କୁ ଭେଟିଥିଲେ। କିଛି ବିଷୟରେ ବିଧାୟକଙ୍କ ସହ ସେ ଯୁକ୍ତିତର୍କ କରିଥିଲେ, ତା’ପରେ ବିଧାୟକ ହସନୁରାମଙ୍କୁ ବହୁତ ଅପମାନ କରିଥିଲେ। ସେହି ଅପମାନର ପ୍ରତିଶୋଧ ନେବା ପାଇଁ ସେ ୧୯୮୫ ମସିହାରୁ ନିର୍ବାଚନ ଲଢ଼ୁଛନ୍ତି। ତେବେ ହାସନୁରାମ ସେହି ସମୟରେ ରାଜସ୍ୱ ବିଭାଗରେ ଅମିନ ଭାବରେ କାର୍ଯ୍ୟ କରୁଥିଲେ ବୋଲି କହିଛନ୍ତି। ସେ ଚାକିରିରୁ ଇସ୍ତଫା ଦେଇ ନିର୍ବାଚନ ଲଢେଇରେ ପ୍ରବେଶ କରିଥିଲେ ବୋଲି ଜାତୀୟ ଗଣମାଧ୍ୟମକୁ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ସେ ହାରିବା ପାଇଁ ନିର୍ବାଚନ ଲଢନ୍ତି। ନିର୍ବାଚନରେ ୧୦୦ ଥର ହାରି ସେ ନିଜର ଏକ ବିରଳ ରେକର୍ଡ ପ୍ରତିଷ୍ଠା କରିବାକୁ ଚାହୁଁଛନ୍ତି।
