ରାଜ୍ୟ ମୌଳିକ ଶିକ୍ଷା ବିଭାଗ ଅଧୀନରେ ଉତ୍ତରପ୍ରଦେଶର କସ୍ତୁରବା ଗାନ୍ଧୀ ବାଳିକା ବିଦ୍ୟାଳୟ (KGBV)ରେ ନିୟୋଜିତ ଜଣେ ଶିକ୍ଷକ ୨୫ ଟି ବିଦ୍ୟାଳୟରେ ଏକକାଳୀନ କାମ କରି ଗୋଟିଏ ବର୍ଷରେ ପ୍ରାୟ ଏକ କୋଟି ଟଙ୍କା ରୋଜଗାର କରିଛନ୍ତି । ବିଭାଗ ଶିକ୍ଷକମାନଙ୍କ ଡାଟାବେସ୍ ତିଆରି ଆରମ୍ଭ କରିବା ପରେ ଏହି ଘଟଣା ସାମ୍ନାକୁ ଆସିଛି ଓ ସମ୍ପୃକ୍ତ ଶିକ୍ଷକଙ୍କ ବିରୋଧରେ ତଦନ୍ତ ନିର୍ଦ୍ଦେଶ ଦିଆଯାଇଛି ।
ବର୍ତ୍ତମାନ ଶିକ୍ଷକମାନଙ୍କର ଡିଜିଟାଲ୍ ଡାଟାବେସ୍ ସୃଷ୍ଟି କରାଯାଉଛି ଏବଂ ଏହି ପ୍ରକ୍ରିୟା ସମୟରେ ଉତ୍ତରପ୍ରଦେଶର ୨୫ ଟି ବିଭିନ୍ନ ବିଦ୍ୟାଳୟରେ ସମାନ ଜଣେ ଶିକ୍ଷକ ନିୟୋଜିତ ହୋଇଥିବା କଥା ଜଣାପଡିଛି । ସୂଚନା ଅନୁଯାୟୀ KGBV ରେ କାର୍ଯ୍ୟ କରୁଥିବା ପୂର୍ଣ୍ଣକାଳୀନ ଶିକ୍ଷୟତ୍ରୀ ଅନାମିକା ଶୁକ୍ଲାଙ୍କୁ ଏକାସାଙ୍ଗରେ ୨୫ ଟି ବିଦ୍ୟାଳୟରେ ଚାକିରି କରୁଥିବା ଘଟଣା ସାମ୍ନାକୁ ଆସିଛି । ଆମେଥୀ, ଆମ୍ବେଦକର ନଗର, ରାବେରେଲି, ପ୍ରୟାଗରାଜ, ଆଲିଗଡ଼ ଏବଂ ଅନ୍ୟାନ୍ୟ ଜିଲ୍ଲାରେ ଶିକ୍ଷକ ଭାବରେ ତାଙ୍କ ନାମ ପଞ୍ଜୀକୃତ ହୋଇଛି ।
ଚଳିତ ବର୍ଷ ଫେବୃଆରୀ ପର୍ଯ୍ୟନ୍ତ ୧୩ ମାସରୁ ଅଧିକ ସମୟ ଧରି ଶିକ୍ଷା ବିଭାଗରୁ ପ୍ରାୟ ୧ କୋଟି ଟଙ୍କା ବେତନ ପ୍ରତ୍ୟାହାର କରିବାରେ ସେ ସଫଳ ହୋଇଥିଲେ । ବିଭାଗ ସହିତ ଉପଲବ୍ଧ ରେକର୍ଡ ଅନୁଯାୟୀ ଅନାମିକା ଶୁକ୍ଲା ମେନପୁରୀ ଜିଲ୍ଲାର ମୂଳବାସିନ୍ଦା ଏବଂ ବିଭାଗ ଦ୍ଵାରା ପଠାଯାଇଥିବା ଅଭିଯୁକ୍ତଙ୍କୁ ନୋଟିସର କୌଣସି ପ୍ରତିକ୍ରିୟା ଏଯାବତ୍ ମିଳି ପାରିନାହିଁ । ବିଭିନ୍ନ ବିଦ୍ୟାଳୟରୁ ବେତନ ସ୍ଥାନାନ୍ତର ପାଇଁ ସମାନ ବ୍ୟାଙ୍କ ଆକାଉଣ୍ଟ ବ୍ୟବହୃତ ହୋଇଛି କି ନା ଜାଣିବାକୁ ଚେଷ୍ଟା କରୁଥିବାବେଳେ ତାଙ୍କ ଦରମା ତୁରନ୍ତ ପ୍ରଭାବ ସହିତ ଅଟକାଇ ଦିଆଯାଇଛି ।
ଉତ୍ତରପ୍ରଦେଶ ମୌଳିକ ଶିକ୍ଷା ମନ୍ତ୍ରୀ ଡ. ସତୀଶ ଦ୍ୱିବେଦୀ କହିଛନ୍ତି ଯେ ବିଭାଗ ନିର୍ଦ୍ଦେଶ ଦେଇଛି ଏବଂ ଅଭିଯୋଗ ସତ ହେଲେ ଅଭିଯୁକ୍ତଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ । ସ୍ୱଚ୍ଛତା ପାଇଁ ସରକାର ଡିଜିଟାଲ ଡାଟାବେସ୍ ତିଆରି କରାଉଛି । ଏହି ମାମଲାରେ ବିଭାଗୀୟ ଅଧିକାରୀଙ୍କ କୌଣସି ସମ୍ପୃକ୍ତି ଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହାବ୍ୟତୀତ କମନ୍ ଅଫ୍ କଲେଜ୍ର ନିର୍ଦ୍ଦେଶକ ବିଜୟ କିରଣ ଆନନ୍ଦଙ୍କ କହିବାନୁଯାୟୀ ପ୍ରେରଣା ପୋର୍ଟାଲ୍ରେ ଅନ୍ଲାଇନ୍ ଉପସ୍ଥାନ ପକାଯାଉଥିବା ବେଳେ ଜଣେ ଶିକ୍ଷକ କିଭଳି ଏକାଧିକ ସ୍ଥାନରେ ନିଜର ହାଜିରା ପକାଇ ପାରିଲେ ? ଏହାର ପୁଙ୍ଖାନୁପୁଙ୍ଖ ତଦନ୍ତ ଆବଶ୍ୟକ ଓ ତଦନ୍ତ ପାଇଁ ଆମେ ଆମ ଅଧିକାରୀମାନଙ୍କୁ କହିଛୁ । ମଇ ୨୬ ତାରିଖ ଦିନ ଏ ବାବଦରେ ରିମାଇଣ୍ଡର୍ ମଧ୍ୟ ପଠାଯାଇଛି ।
