ସଂସ୍କାର : କ’ଣ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ରାଷ୍ଟ୍ରପତି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ କି? ପ୍ରଶାନ୍ତ କିଶୋରଙ୍କୁ କାହିଁକି ଭେଟିଲେ ନୀତୀଶ କୁମାର ? ଦୁହିଁଙ୍କ ମିଟିଂ ପଛରେ ରାଷ୍ଟ୍ରପତି ପଦ ପ୍ରକୃତ କାରଣ ନୁହଁ ତ ? ବିହାର ରାଜ୍ୟକୁ ନେଇ ବର୍ତ୍ତମାନ ଦେଶର ରାଜନୈତିକ ମାହୋଲ ବେଶ ତାଜା ରହିଛି। କାରଣ ଗତକାଲି ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କୁ ୫ ବର୍ଷ ପାଇଁ ଜେଲ୍ ଦଣ୍ଡାଦେଶ ଶୁଣାଇଛନ୍ତି ରାଞ୍ଚି, ଝାଡ଼ଖଣ୍ଡର ସ୍ୱତନ୍ତ୍ର ସିବିଆଇ କୋର୍ଟ । ଏହାରି ମଧ୍ୟରେ ଆଜି ଶୁଣିବାକୁ ମିଳୁଛି ଯେ, ବିହାର ରାଜ୍ୟର ବର୍ତ୍ତମାନ ମୁଖ୍ୟମନ୍ତ୍ରୀ ଥିବା ନୀତୀଶ କୁମାର ରାଷ୍ଟ୍ରପତି ପଦ ପାଇଁ ବିରୋଧୀ ଦଳର ପ୍ରାର୍ଥୀ ହେବେ।
ଜାତୀୟ ଗଣମାଧ୍ୟମର ଏହି ରିପୋର୍ଟ ପରେ ବର୍ତ୍ତମାନ ବିହାରକୁ ନେଇ ଦେଶର ରାଜନୈତିକ ମାହୋଲ ସରଗରମ ରହିଛି। ଏହା କୁହାଯାଉଛି ଯେ ତେଲେଙ୍ଗାନା ସିଏମ କେ ଚନ୍ଦ୍ରଶେଖର ରାଓ ଏବଂ ଅନ୍ୟ ଦଳ ସହ ଯୋଗାଯୋଗ କରିବାକୁ ନୀତୀଶ କୁମାରଙ୍କୁ ପ୍ରସ୍ତୁତ କରିବା ପାଇଁ ପ୍ରଶାନ୍ତ କିଶୋରଙ୍କୁ ଏକ ମାଧ୍ୟମ କରାଯାଇଛି।
ତେବେ ଚଳିତ ବର୍ଷ ଜୁଲାଇ-ଅଗଷ୍ଟ ମାସରେ ଦେଶରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହି ପ୍ରସଙ୍ଗରେ ବିଜେପି ବିରୋଧରେ ସ୍ୱର ଉତ୍ତୋଳନ କରୁଥିବା ତେଲେଙ୍ଗାନା ସିଏମ କେ.ସି.ଆର. ଅଣ-ବିଜେପି ଏବଂ ଅଣ-କଂଗ୍ରେସ ଦଳକୁ ଏକଜୁଟ କରିବା ପାଇଁ ଏହି ପଦକ୍ଷେପ ନେଇଥିବା ଆଲୋଚନା ହେଉଛି।
ଚଳିତ ମାସର ପ୍ରାରମ୍ଭରେ ପ୍ରଶାନ୍ତ କିଶୋର ଏବଂ କେସିଆର ମଧ୍ୟରେ ଏକ ବୈଠକ ହୋଇଥିଲା। ଏହା ପରେ ପ୍ରଶାନ୍ତ କିଶୋର ବିହାର ସିଏମ ନୀତୀଶ କୁମାରଙ୍କୁ ଭେଟିଥିଲେ। ତେବେ ଅତୀତରେ ତେଜସ୍ୱୀ ଯାଦବ ମଧ୍ୟ କେ.ଆର.ସି ବ୍ୟତୀତ ଶିବସେନା ମୁଖ୍ୟ ଉଦ୍ଧବ ଠାକରେ ଏବଂ ଜାତୀୟତାବାଦୀ କଂଗ୍ରେସ ପାର୍ଟି ମୁଖ୍ୟ ଶରଦ ପାୱାରଙ୍କୁ ମଧ୍ୟ ଭେଟିଥିଲେ। ଏହି ସମସ୍ତ ବୈଠକର ଏଜେଣ୍ଡା ଥିଲା ରାଷ୍ଟ୍ରପତି ନିର୍ବାଚନ ମାଧ୍ୟମରେ ବିଜେପିକୁ ଏକ ଜୋରଦାର ଝଟକା ଦେବା। ଯାହାକି ଜାତୀୟ ଗଣମାଧ୍ୟମରେ ଆଲୋଚନା ହେଉଛି। କଂଗ୍ରେସ ବ୍ୟତୀତ ଟିଏମସି, ଏସପି, ଏଏପି, ଆରଜେଡି, ଜେଡିୟୁ ଭଳି ଅନ୍ୟ ସମସ୍ତ ଦଳ ଏକାଠି ହେବା ଉଚିତ ବୋଲି କେସିଆର ଚେଷ୍ଟା କରିଛି। ଦେଶର ରାଷ୍ଟ୍ରପତି ପଦ ପାଇଁ ନୀତୀଶ କୁମାର ଜଣେ ଅତି ଶକ୍ତିଶାଳୀ ପ୍ରାର୍ଥୀ ହେବେ ବୋଲି କଂଗ୍ରେସ ଆଶା କରୁଛି ଏବଂ ତାଙ୍କୁ ସମର୍ଥନ କରିବାକୁ କଂଗ୍ରେସ ମଧ୍ୟ ବାଧ୍ୟ ହୋଇପାରେ ବୋଲି ରାଜନୈତିକ ମାହୋଲରେ ଆଲୋଚନା ହେଉଛି।
