ଚଣ୍ଡିଗଡ଼: ପଟିଆଲା ସାନୋର ରୋଡର ବଡ ପନିପରିବା ବଜାର ବାହାରେ ଥିବା ମୁଖ୍ୟ ଫାଟକରେ ନିହଙ୍ଗ ସିଂ ପୋଲିସ ଉପରେ ଆକ୍ରମଣ କରିଦେଇଛନ୍ତି । ରବିବାର ଦିନ ସକାଳ ପ୍ରାୟ ୬ ଟାରେ ଘଟିଥିବା ଏହି ଆକ୍ରମଣରେ ଜଣେ ଏ.ଏସ.ଆଇ.ର ହାତ ମଣିବନ୍ଧ କଟି ଅଲଗା ହେଇଯାଇଛି । ଏହାସହିତ ଥାନା ଇନଚାର୍ଜ ବିକ୍କର ସିଂ ଏବଂ ଅନ୍ୟ ଜଣେ କର୍ମଚାରୀ ଆହତ ହୋଇଛନ୍ତି । ଏହି ଘଟଣା ପରେ ନିହଙ୍ଗ ଗୋଟେ ଗୁରୁଦ୍ୱାରରେ ଲୁଚିଗଲେ । ସେମାନଙ୍କୁ ବାହାରକୁ ଆଣିବା ପାଇଁ କମାଣ୍ଡୋ ଫୋର୍ସ, ଏସ.ଏସ.ପି. ପଟିଆଲା, ମନଦୀପ ସିଂ ସିଦ୍ଧୁ, ଏ.ଡି.ଜି.ପି. ରାକେଶ ଚନ୍ଦ୍ର, ପଟିଆଲା ଜୋନର ଆଇ.ଜି. ଜତିନ୍ଦର ସିଂ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ ।
ବହୁ ସମୟ ଧରି ଗୁଳି ବିନିମୟର ଶବ୍ଦ ଶୁଭିଲା ପରେ କୁହାଯାଉଛି ଯେ କମାଣ୍ଡୋମାନେ ୯ ଜଣଙ୍କୁ କାବୁ କରି ନେଇଛନ୍ତି । ଜଣେ ନିହଙ୍ଗ ଆହତ ହୋଇଛନ୍ତି । ଗୁରୁଦ୍ୱାରରେ ଦୁଇଜଣ ମହିଳା ମଧ୍ୟ ଉପସ୍ଥିତ ଥିଲେ । ପୋଲିସ ସେମାନଙ୍କୁ ଗିରଫ କରନ୍ତେ ଦୁଇ ଜଣଯାକ ମହିଳା ପାଠ କରିବା ଆରମ୍ଭ କରିଥିଲେ । ଏଥିମଧ୍ୟରୁ ଜଣେ ମହିଳା ପାଠ କରିବା ସାରିଲା ପରେ ତାକୁ ଗିରଫ କରାଗଲା ଓ ଅନ୍ୟ ମହିଳା ଜଣକ ପାଠ ଚାଲୁ ରଖିଛନ୍ତି ।
ପଟିଆଲା ପୋଲିସ ସୂତ୍ର ଅନୁଯାୟୀ ଏହି ଅପରେସନ ସମୟରେ କ୍ୟାମ୍ପର ମୁଖୀ ବଲୱିନ୍ଦର ସିଂଙ୍କୁ ଗୁଳି ଲାଗିଛି । ଗୁଳିଟି ବଲୱିନ୍ଦର ସିଂଙ୍କ ମୁଣ୍ଡକୁ ଛୁଇଁ ବାହାରି ଯାଇଛି । ଶିବିରରେ ବଲବିନ୍ଦର ସିଂଙ୍କୁ ଛାଡ଼ି ତାଙ୍କ ପୁଅ, ପତ୍ନୀ ଏବଂ ସମର୍ଥକମାନେ ରୁହନ୍ତି । ପଟିଆଲା ପୋଲିସ ପାର୍ଟି ଉପରେ ହୋଇଥିବା ଆକ୍ରମଣ ଘଟଣାରେ ଗୁରୁଦ୍ୱାର ସାହିବ ଭିତରୁ ଅସ୍ତ୍ରଶସ୍ତ୍ର ଉଦ୍ଧାର କରାଯାଇଛି, ଯେଉଁଥିରେ ସ୍ୱଦେଶୀ ପିସ୍ତଲ, କିରପାନ ପେଟ୍ରୋଲ, ୭ ବସ୍ତା ଭାଙ୍ଗ ଏବଂ ବହୁ ପରିମାଣର ରାସାୟନିକ ପଦାର୍ଥ ପରି ତରଳ ପଦାର୍ଥ ରହିଛି ।
ଏସ.ଏସ.ପି. ପଟିଆଲା ମନଦୀପ ସିଂ ସିଦ୍ଧୁ କହିଛନ୍ତି ଯେ ମୋଟ ୯ ଜଣଙ୍କୁ ଗିରଫ କରାଯାଇଛି । ଅସ୍ତ୍ରଶସ୍ତ୍ର ବ୍ୟତୀତ ଏହି ଲୋକଙ୍କଠାରୁ ନଗଦ ଟଙ୍କା ଜବତ କରାଯାଇଛି । ନଗଦ ଗଣନା କରାଯାଉଛି ଏବଂ ବର୍ତ୍ତମାନ ପର୍ଯ୍ୟନ୍ତ ୩୦ ଲକ୍ଷ ହିସାବ କରାଯାଇଛି ।
ପ୍ରାୟ ୫ ନିହଙ୍ଗ ସିଂ କାରରେ ପନିପରିବା ବଜାରରେ ପହଞ୍ଚିଥିଲେ । ଏଠାରେ ପନିପରିବା ବଜାରର କର୍ମଚାରୀ ଏହି ଲୋକଙ୍କ କାରକୁ ଅଟକାଇ କର୍ଫ୍ୟୁ ପାସ୍ ବିଷୟରେ ପଚାରିଥିଲେ, ଯାହାଫଳରେ ବଜାରରେ ଅନାବଶ୍ୟକ ଭିଡ଼ ନଥାଏ । ସେମାନଙ୍କ ପାଖରେ ପାସ ନଥିବା ବେଳେ ଏହି ଲୋକମାନେ ପନିପରିବା ବଜାରର କର୍ମଚାରୀଙ୍କ ସହ ଝଗଡ଼ା କରି ପୋଲିସ ଅବରୋଧରେ ଲାଗିଥିବା ବ୍ୟାରିକେଡ୍ ଭାଙ୍ଗି ଗାଡ଼ି ସହିତ ଫେରାର ହେବାକୁ ଚେଷ୍ଟା କରିଥିଲେ । ପରବର୍ତ୍ତୀ ସମୟରେ ଲୋକମାନେ ତାଙ୍କ କାରକୁ ଘେରାଉ କରିଥିଲେ ।
