ସଂସ୍କାର : ଏକଦା ମହାରାଷ୍ଟ୍ର ବିଜେପିର ଜଣେ ବରିଷ୍ଠ ନେତା ତଥା ବର୍ତ୍ତମାନ ଏନସିପି (Nationalist Congress Party) ସଦସ୍ୟ ଥିବା ଏକନାଥ ଖାଡସେ ପୁଣି ଥରେ ବିଜେପିକୁ ଫେରିବା ପାଇଁ ଉଦ୍ୟମ କରୁଛନ୍ତି। କେବଳ ଏତିକି ନୁହେଁ ସେ ଦିଲ୍ଲୀ ଆସି ଅମିତ ଶାହାଙ୍କୁ ଭେଟିବା ପାଇଁ ତିନି ଘଣ୍ଟା ଅପେକ୍ଷା କରିଥିଲେ ମଧ୍ୟ ଅମିତ ଶାହା ତାଙ୍କୁ ସମୟ ଦେଇ ନ ଥିଲେ।
ଏହି କାରଣରୁ ସେ ବର୍ତ୍ତମାନ ପର୍ଯ୍ୟନ୍ତ ବିଜେପିରେ ଯୋଗ ଦେଇପାରି ନାହାଁନ୍ତି ଏବଂ ନିରାଶ ହୋଇଛନ୍ତି। ମହାରାଷ୍ଟ୍ର ସରକାରରେ ବିଜେପି ନେତା ତଥା ମନ୍ତ୍ରୀ ଗିରିଶ ମହାଜନ ଏହି ଦାବି କରିଛନ୍ତି।
ସେ କହିଛନ୍ତି ଯେ ଏକନାଥ ଖାଡସେ ଏନସିପିରେ ଖୁସି ନୁହଁନ୍ତି ଏବଂ ସେ ଅମିତ ଶାହା ଏବଂ ଦେବେନ୍ଦ୍ର ଫଡନାଭିସଙ୍କୁ କ୍ରମାଗତ ଭାବରେ ଦେଖା କରିବାକୁ ଯାଉଛନ୍ତି। ସେ କହିଛନ୍ତି ଯେ ଏକନାଥ ଖାଡସେ ତାଙ୍କ ବୋହୂ ରକ୍ଷା ଖାଡେସଙ୍କ ସହ ଦିଲ୍ଲୀରେ ପହଞ୍ଚି ଅମିତ ଶାହାଙ୍କୁ ଭେଟିବାକୁ ଚେଷ୍ଟା କରିଥିଲେ।
ମହାଜନ କହିଛନ୍ତି ଯେ, ‘ଆମେ ଜାଣିଛୁ ଯେ ଏକନାଥ ଖାଡସେ ତାଙ୍କ ବୋହୂ ସହିତ ଅମିତ ଶାହାଙ୍କୁ ଭେଟିବା ପାଇଁ ଦିଲ୍ଲୀ ଯାଇଥିଲେ। ତେବେ ଅମିତ ଶାହାଙ୍କ କାର୍ଯ୍ୟାଳୟ ବାହାରେ ତିନି ଘଣ୍ଟା ବସିବା ପରେ ମଧ୍ୟ ତାଙ୍କୁ ଭେଟିବାର ସୁଯୋଗ ମିଳି ନଥିଲା। ରକ୍ଷା ଖାଡେସ ମୋତେ ଏହା କହିଛନ୍ତି।
ଗିରିଶ ମହାଜନ ଆହୁରି କହିଛନ୍ତି ଯେ ଯଦି ଅମିତ ଶାହା ଏକନାଥ ଖାଡସେଙ୍କୁ ତିନି ଘଣ୍ଟା ଅପେକ୍ଷା କରାଇବା ପରେ ମଧ୍ୟ ସାକ୍ଷାତ କରିନାହାଁନ୍ତି, ତେବେ ଏହା ଏକ ସୂଚକ ଯେ ବିଜେପି ତାଙ୍କୁ ଦଳକୁ ଆଣିବାକୁ ଚାହୁଁନାହିଁ। ସେ କହିଛନ୍ତି ଯେ ଖାଡସେ ତାଙ୍କୁ ଏବଂ ଦେବେନ୍ଦ୍ର ଫଡନାଭିସଙ୍କୁ କିଛି ମାସ ଧରି ବିଜେପିକୁ ଫେରିବା ପାଇଁ ସୂଚାଉଛନ୍ତି।
