ସଂସ୍କାର : ୧୯୮୭ ମସିହାରେ ଦୂରଦର୍ଶନରେ ପ୍ରସାରିତ ରାମାନନ୍ଦ ସାଗରଙ୍କ ବହୁ ଲୋକପ୍ରିୟ ପୌରାଣିକ ସିରିଏଲ ‘ରାମାୟଣ’ରେ ରାବଣ ଭୂମିକାରେ ଅଭିନୟ କରିଥିବା ଅଭିନେତା ଅରବିନ୍ଦ ତ୍ରିବେଦୀଙ୍କର ମଙ୍ଗଳବାର ରାତିରେ ହୃଦଘାତରେ ମୃତ୍ୟୁ ଘଟିଛି। ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ବୟସ ହୋଇଥିଲା ଏବଂ ସେ ଦୀର୍ଘ ସମୟ ଧରି ବୟସ ସମ୍ବନ୍ଧୀୟ ରୋଗରେ ପୀଡିତ ଥିଲେ। ଏହି କାରଣରୁ ସେ ଚାଲିବାକୁ ମଧ୍ୟ ଅସମର୍ଥ ହୋଇଥିଲେ।
ଅରବିନ୍ଦ ତ୍ରିବେଦୀଙ୍କ ପୁତୁରା କୈଷ୍ଟୁଭ ତ୍ରିବେଦୀ ତାଙ୍କ କାକା ଅରବିନ୍ଦ ତ୍ରିବେଦୀଙ୍କ ମୃତ୍ୟୁ ଖବର ଜାତୀୟ ଗଣମାଧ୍ୟମକୁ ଦେଇଥିଲେ। ସେ ଏହି ଦୁଃଖ ଖବର ଫୋନ୍ରେ ମାଧ୍ୟମରେ ଦେଇଥିଲେ। ସେ କହିଛନ୍ତି ଯେ, ଗତ କିଛି ବର୍ଷ ହେବ କାକା ନିରନ୍ତର ଅସୁସ୍ଥ ହୋଇପଡିଥିଲେ। ଗତ ୩ ବର୍ଷ ଧରି ତାଙ୍କ ସ୍ୱାସ୍ଥ୍ୟ ଅବସ୍ଥା ଖରାପ ହେବାକୁ ଲାଗିଲା। ଏଭଳି ପରିସ୍ଥିତିରେ, ତାଙ୍କୁ ଦୁଇ-ତିନିଥର ଡାକ୍ତରଖାନାରେ ଭର୍ତ୍ତି କରିବାକୁ ପଡିଲା। ସେ ଏକ ମାସ ପୂର୍ବରୁ ପୁଣି ଥରେ ହସ୍ପିଟାଲରୁ ଘରକୁ ଫେରିଥିଲେ। ତେବେ ମଙ୍ଗଳବାର ରାତି ୯.୩୦ ସମୟରେ ସେ ହୃଦଘାତରେ ପୀଡିତ ହୋଇ କାଣ୍ଡିଭାଲୀ ସ୍ଥିତ ତାଙ୍କ ଘରେ ମୃତ୍ୟୁ ବରଣ କରିଛନ୍ତି।
ସୂଚନାଯୋଗ୍ୟ ଯେ, ‘ରାମାୟଣ’ରେ ରାବଣର ଚରିତ୍ରର ସଫଳତା ପରେ ଅରବିନ୍ଦ ତ୍ରିବେଦୀଙ୍କୁ ଲୋକସଭା ନିର୍ବାଚନ ପାଇଁ ବିଜେପି ପକ୍ଷରୁ ଟିକେଟ୍ ଦିଆଯାଇଥିଲା। ସେ କେବଳ ଗୁଜୁରାଟର ସାବରକାନ୍ତରୁ ବିଜେପି ଟିକେଟରେ ପ୍ରତିଦ୍ୱନ୍ଦ୍ୱିତା କରିନାହାଁନ୍ତି, ରାବଣର ପୋରାଣିକ ଚରିତ୍ରର ସଫଳତା ହେତୁ ସେ ନିର୍ବାଚନରେ ମଧ୍ୟ ଜିତିଥିଲେ। ୧୯୯୧ ରୁ ୧୯୯୬ ମସିହା ପର୍ଯ୍ୟନ୍ତ ସେ ଲୋକସଭା ସାଂସଦ ଥିଲେ। ଅରବିନ୍ଦ ତ୍ରିବେଦୀଙ୍କ ଭାଇ ଉପେନ୍ଦ୍ର ତ୍ରିବେଦୀ ମଧ୍ୟ ଗୁଜୁରାଟୀ ଥିଏଟର ଏବଂ ସିନେମାର ଜଣେ ଜଣାଶୁଣା ଅଭିନେତା ଥିଲେ।
