ସଂସ୍କାର: ରାଷ୍ଟ୍ରପତି ନିର୍ବାଚନକୁ ନେଇ ପ୍ରସ୍ତୁତି ଆରମ୍ଭ ହୋଇଛି। ଜୁଲାଇ ଶେଷ ସପ୍ତାହରେ ହୋଇପାରେ ଦେଶ ପାଇଁ ନୂଆ ରାଷ୍ଟ୍ରମୁଖ୍ୟ ନିର୍ବାଚନ। ତାହା ପାଇଁ ଏବେଠାରୁ ପ୍ରସ୍ତୁତି ଆରମ୍ଭ କରିଛନ୍ତି ଦେଶର ଦୁଇଟି ରାଜନୈତିକ ଦଳ କଂଗ୍ରେସ ଆଉ ବିଜେପି।
ଉତ୍ତର ପ୍ରଦେଶ ସମେତ ପାଞ୍ଚଟି ରାଜ୍ୟରେ ବିଧାନସଭା ନିର୍ବାଚନ ପରେ ଦେଶର ପରବର୍ତ୍ତୀ ରାଷ୍ଟ୍ରପତି ପଦବୀକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। ବର୍ତ୍ତମାନର ନିର୍ବାଚନ ଫଳାଫଳ ମଧ୍ୟ ରାଜ୍ୟସଭାରେ ଶାସକ ଭାରତୀୟ ଜନତା ପାର୍ଟି (BJP)ର ସ୍ଥିତିକୁ ମଜବୁତ କରିଛି। ସଂଖ୍ୟା ଦୃଷ୍ଟିରୁ ଚଳିତବର୍ଷ ହେବାକୁ ଥିବା ରାଷ୍ଟ୍ରପତି ନିର୍ବାଚନରେ ମଧ୍ୟ ଦଳର ସ୍ଥିତି ସୁଦୃଢ ରହିଛି। ଏହାରି ମଧ୍ୟରେ ପରବର୍ତ୍ତୀ ରାଷ୍ଟ୍ରପତି ପାଇଁ ଜଣଙ୍କର ନାମକୁ ନେଇ ବିଜେପିରେ ଚର୍ଚ୍ଚା ଚାଲିଛି।
ନିର୍ବାଚନ କଲେଜ (electoral college) ମାଧ୍ୟମରେ ଭାରତର ରାଷ୍ଟ୍ରପତି ନିର୍ବାଚିତ ହୁଅନ୍ତି। ଏହି ନିର୍ବାଚନ କଲେଜରେ ଲୋକସଭା ଏବଂ ରାଜ୍ୟସଭାର ୭୭୬ ସାଂସଦ ଏବଂ ବିଭିନ୍ନ ରାଜ୍ୟରୁ ମୋଟ ୪୧୨୦ ଜଣ ବିଧାୟକ ରହିଛନ୍ତି। ମୋଟ ଭୋଟର କଲେଜର କ୍ଷମତା ୧୦,୯୮,୯୦୩ ଭୋଟ ଏବଂ ବିଜେପି ନିକଟରେ ମୋଟ କ୍ଷମତାର ୫୦ ପ୍ରତିଶତରୁ ଅଧିକ ଭୋଟ ରହିଛି। ପ୍ରତ୍ୟେକ ସାଂସଦଙ୍କ ଭୋଟର ୭୦୮ କିନ୍ତୁ ବିଧାୟକଙ୍କ କ୍ଷେତ୍ରରେ ଏହା ରାଜ୍ୟ ଅନୁଯାୟୀ ସ୍ଥିର ହୋଇଥାଏ।
ଉତ୍ତର ପ୍ରଦେଶରେ ପ୍ରତ୍ୟେକ ବିଧାୟକଙ୍କ ଭୋଟ କ୍ଷମତା ୨୦୮। ଦେଶର ବୃହତ୍ତମ ରାଜ୍ୟ ୟୁପି ସମେତ ଚାରୋଟି ରାଜ୍ୟରେ ବିଜେପି କ୍ଷମତା ହାସଲ କରିଛି। ୟୁପିରେ ବିଜେପିର ରେକର୍ଡ ବିଜୟ ମାର୍ଚ୍ଚ ୩୧ରେ ହେବାକୁ ଥିବା ରାଜ୍ୟସଭା ନିର୍ବାଚନ ଏବଂ ଜୁଲାଇରେ ସମ୍ଭାବ୍ୟ ରାଷ୍ଟ୍ରପତି ନିର୍ବାଚନ ଉପରେ ପ୍ରଭାବ ପକାଇବ। ୟୁପିରେ ବିଜେପି ଏବଂ ଏହାର ସହଯୋଗୀ ଦଳ ୨୭୩ଟି ଆସନ ଜିତିଛନ୍ତି। ତେଣୁ ଆସନ୍ତା ରାଷ୍ଟ୍ରପତି ନିର୍ବାଚନରେ ବିଜେପି ପ୍ରାର୍ଥୀ ଜିତିବାରେ କୌଣସି ଅସୁବିଧା ହେବ ନାହିଁ। ଉପରାଷ୍ଟ୍ରପତି ଏମ ଭେଙ୍କୟା ନାଇଡୁ ଏହି ଶୀର୍ଷ ପଦବୀ ପାଇଁ ଆଗଧାଡିରେ ଅଛନ୍ତି ବୋଲି କୁହାଯାଉଛି।
ବର୍ତ୍ତମାନର ରାଷ୍ଟ୍ରପତି ରାମନାଥ କୋବିନ୍ଦଙ୍କୁ ଦ୍ୱିତୀୟ କାର୍ଯ୍ୟକାଳ ପ୍ରଦାନ କରାଯିବା ଉଚିତ କି ନାହିଁ ତାହା ଉପରେ ବିଜେପି ନେତୃତ୍ୱ ନିଷ୍ପତ୍ତି ନେଇ ନାହାଁନ୍ତି। ଏପର୍ଯ୍ୟନ୍ତ କେବଳ ଦେଶର ପ୍ରଥମ ରାଷ୍ଟ୍ରପତି ରାଜେନ୍ଦ୍ର ପ୍ରସାଦଙ୍କୁ ଦୁଇ ଥର କାର୍ଯ୍ୟକାଳ ମିଳିଛି। ଏହି ପ୍ରସଙ୍ଗରେ ଗଭୀର ଭାବେ ବିଚାରର ଆବଶ୍ୟକତା ରହିଛି। ରାଷ୍ଟ୍ରପତି ଭବନ ପାଇଁ କିଏ ସବୁଠାରୁ ଉପଯୁକ୍ତ ବ୍ୟକ୍ତି ହେବେ ସେ ନେଇ ଶେଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଷ୍ପତ୍ତି ନେବେ ବୋଲି ସରକାରୀ ସୂତ୍ର ସୂଚନା ମିଳିଛି। ସେପଟେ ବିରୋଧିମାନେ ମିଳିତ ପ୍ରାର୍ଥୀ ଦେବାକୁ ଯୋଜନା କରୁଛନ୍ତି।
