ରାଜସ୍ଥାନର ଜୟପୁର ସ୍ଥିତ ସେଲବି ହସ୍ପିଟାଲରୁ ସାମ୍ନାକୁ ଆସିଛି ଏକ ସମ୍ବେଦନଶୀଳ ମାମଲା ଯେଉଁଥିରେ ICU ରେ ଭର୍ତ୍ତି ଜଣେ ମହିଳାଙ୍କ ସହିତ ହୋଇଛି ନିନ୍ଦନୀୟ କାର୍ଯ୍ୟ । ଘଟଣାଟି ଘଟିଥିଲା ମାର୍ଚ୍ଚ ୧୫ ତାରଖ ଦିନ । ହଠାତ୍ ଦେହ ଖରାପ ହେଲାରୁ ଜଣେ ମହିଳାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଇଦିନ ସନ୍ଧ୍ୟାରେ ତାଙ୍କର ଏକ ଅପରେସନ୍ କରାଯାଇଥିଲା ଏବଂ ICU ରେ ଭେଣ୍ଟିଲେଟରରେ ରଖାଯାଇଥିଲା । ରାତି ରହଣୀର ସୁବିଧା ନଥିବାରୁ ସ୍ଵାମୀ ଘରକୁ ପଳାଇଥିଲେ ଏବଂ ପରଦିନ ସକାଳେ ଫେରିଥିଲେ । ହେଲେ ପତ୍ନୀଙ୍କୁ ଭେଟିବା ପରେ ଯାହା ଜାଣିଲେ ତାହା ଚମକାଇ ଦେଲା ।
ତେବେ ହସ୍ପିଟାଲରେ ICU ରେ ଭର୍ତ୍ତି ମହିଳାଙ୍କ ସହିତ ଯୌନ ଶୋଷଣ ହୋଇଛି ବୋଲି ଜଣାପଡ଼ିଛି । ପୀଡ଼ିତ ମହିଳା ତାଙ୍କ ସ୍ୱାମୀଙ୍କୁ ଲେଖି କହିଥିଲେ ଯେ ରାତିରେ ମେଲ ନର୍ସିଂ ୱାର୍ଡ ବଏ ତାଙ୍କୁ ବାରମ୍ବାର ପିଂଚ୍ କରି ଦେଖୁଥିଲେ ସେ ସଚେତନ ଅଛନ୍ତି କି ନା । ମହିଳାଙ୍କ ପାଟିରେ ଅକ୍ସିଜେନ ମାସ୍କ ଥିଲା ଏବଂ ତାଙ୍କ ହାତ ମଧ୍ୟ ବନ୍ଧା ହୋଇଥିଲା । ସେ ଶାରୀରିକ ସ୍ତରରେ ସକ୍ଷମ ନଥିଲେ ଅଭିଯୁକ୍ତକୁ ପ୍ରତିରୋଧ କରିବା ପାଇଁ । ଏହାର ସୁଯୋଗ ନେଇ ତାଙ୍କ ସହିତ ଅନେକ ଥର ଅଶ୍ଳୀଳ କାର୍ଯ୍ୟ କରାଯାଇଛି ।
ସ୍ୱାମୀ ସକାଳେ ପତ୍ନୀଠାରୁ ଏନେଇ ଜାଣିଲା ପରେ ପୋଲିସ ନିକଟରେ ଅଭିଯୋଗ କରିଥିଲେ । ମହିଳା ଏହା ମଧ୍ୟ କହିଛନ୍ତି ଯେ କୌଣସି ମହିଳା ନର୍ସ ତାଙ୍କ ଯତ୍ନ ନେଉ ନଥିଲେ । ସକାଳେ ଯେତେବେଳେ ଜଣେ ମହିଳା ନର୍ସ ତାଙ୍କ ପୋଷାକ ବଦଳାଇବାକୁ ଆସିଥିଲେ, ପୀଡ଼ିତା ରାତି ଘଟଣା ତାଙ୍କୁ କହିବାକୁ ଚେଷ୍ଟା କରିଥିଲେ । ମାତ୍ର ସେଠାରେ ଉକ୍ତ ଅଭିଯୁକ୍ତ ମେଲ ନର୍ସିଂ ୱାର୍ଡ ବଏ ବି ଠିଆ ହୋଇଥିଲା । ପରେ ସ୍ୱାମୀଙ୍କୁ ଲେଖି ପୁରା କାହାଣୀ କହିଥିଲେ ।
ଏମିତିକି ପୀଡ଼ିତା ମହିଳାଙ୍କ ସ୍ୱାମୀ କହିଛନ୍ତି ଯେ ଯେତେବେଳେ ସେ ଡାକ୍ତରଖାନା କର୍ମଚାରୀଙ୍କ ସହ ଏ ବିଷୟରେ କଥାବାର୍ତ୍ତା ହେଲେ ଦୁଇ ତିନି ଜଣ ୱାର୍ଡ ବଏ ପହଞ୍ଚିଥିଲେ ଏବଂ ଚୁପ୍ ରହିବାକୁ ଧମକ ଦେଇଥିଲେ । ସେପଟେ ସିସିଟିଭି ଫୁଟେଜ ଏବଂ ଡାକ୍ତରଖାନାର ଡ୍ୟୁଟି ଚାର୍ଟ ଅନୁଯାୟୀ ଅଭିଯୁକ୍ତକୁ ଚିହ୍ନଟ କରି ପୋଲିସ ଏହି ଘଟଣାର ତଦନ୍ତ କରୁଛି । ଏହାସହିତ ମଙ୍ଗଳବାର ଦିନ ବିଳମ୍ବିତ ରାତିରେ ଅଭିଯୁକ୍ତକୁ ଗିରଫ ମଧ୍ୟ କରାଯାଇଥିଲା ।
