ସଂସ୍କାର: ପାଞ୍ଚଟି ରାଜ୍ୟର ବିଧାନସଭା ନିର୍ବାଚନରେ ଶୋଚନୀୟ ପରାଜୟ ପରେ କଂଗ୍ରେସ ପୁଣି ଥରେ ନିର୍ବାଚନ ରଣନୀତିଜ୍ଞ ପ୍ରଶାନ୍ତ କିଶୋରଙ୍କ ସହ ସମ୍ପର୍କରେ ଅଛି । ପିକେ ଦଳର ଶୀର୍ଷ ନେତୃତ୍ୱ ସହିତ ସାକ୍ଷାତ କରିସାରିଛନ୍ତି ଓ ଗତ ବର୍ଷ ତୁଳନାରେ ଉଭୟ ପକ୍ଷ ଅଧିକ ସକାରାତ୍ମକ ଅଛନ୍ତି । ଏଭଳି ପରିସ୍ଥିତିରେ ପ୍ରଶାନ୍ତ କିଶୋର ଗୁଜୁରାଟ ଓ ହିମାଚଳ ପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସର ନେତା ଭାବରେ ପ୍ରଚାର କରିବାର ଦାୟିତ୍ୱ ସମ୍ଭାଳି ପାରନ୍ତି ବୋଲି ଆଲୋଚନା ହେଉଛି।
କଂଗ୍ରେସର ଜଣେ ବରିଷ୍ଠ ନେତା କହିଛନ୍ତି ଯେ, ପ୍ରଶାନ୍ତ କିଶୋର ନିର୍ବାଚନ ରଣନୀତିଜ୍ଞଙ୍କ ଅପେକ୍ଷା ନେତା ଭାବେ କାମ କରିବାକୁ ଚାହୁଁଛନ୍ତି । ଏହାପୂର୍ବରୁ ମଧ୍ୟ ସେ ଥରେ ଦଳରେ ଯୋଗଦେବାକୁ ଇଚ୍ଛା ପ୍ରକାଶ କରିଥିଲେ, କିନ୍ତୁ ସେହି ସମୟରେ କିଛି କାରଣ ଯୋଗୁଁ କଥା ଆଗକୁ ବଢ଼ିପାରିନଥିଲା । ସୂତ୍ରରୁ ପ୍ରକାଶ ଯେ ପ୍ରଶାନ୍ତ ଦଳରେ ଯୋଗ ଦେଇ ଗୁଜୁରାଟ ଓ ହିମାଚଳ ସହିତ ୨୦୨୪ ଲୋକସଭା ନିର୍ବାଚନ ରଣନୀତି ଉପରେ କାମ କରିବାକୁ ଚାହୁଁଛନ୍ତି ।
ପ୍ରଶାନ୍ତ କିଶୋର ଗତ ବର୍ଷ ସେପ୍ଟେମ୍ବରରେ କଂଗ୍ରେସ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିଥିଲେ । ଏହା ପରେ ଦଳ ସାଧାରଣ ସଚିବ ଭାବେ ନିଯୁକ୍ତି ଦେଇ ନିର୍ବାଚନର ଦାୟିତ୍ୱ ହସ୍ତାନ୍ତର କରିପାରେ ବୋଲି ଅନୁମାନ କରାଯାଉଥିଲା । କିନ୍ତୁ ସେତେବେଳେ ଦଳର ନେତାମାନେ ମତ ରଖିଥିଲେ ଯେ ପ୍ରଶାନ୍ତଙ୍କୁ ଦଳର ସାଧାରଣ ସଚିବ କରି ସମ୍ପୂର୍ଣ୍ଣ ଦାୟିତ୍ୱ ହସ୍ତାନ୍ତର କରିବା ପରିବର୍ତ୍ତେ ତାଙ୍କୁ ପରାମର୍ଶଦାତା ଭୂମିକାରେ ରଖାଯିବା ଉଚିତ । ତେଣୁ ବାର୍ତ୍ତାଳାପ ଆଗକୁ ବଢ଼ି ପାରିନଥିଲା ।
ଚଳିତ ମାସରେ ଅନୁଷ୍ଠିତ ପାଞ୍ଚଟି ରାଜ୍ୟ ମଧ୍ୟରୁ ତିନୋଟିରେ କଂଗ୍ରେସର ବିଜେପି (BJP) ସହିତ ସିଧାସଳଖ ମୁକାବିଲା ଥିଲା । ଏହି ତିନୋଟି ରାଜ୍ୟ- ଉତ୍ତରାଖଣ୍ଡ, ଗୋଆ ଏବଂ ମଣିପୁରରେ ଦଳକୁ ପରାଜୟର ସାମ୍ନା କରିବାକୁ ପଡିଥିଲା । ଗୁଜୁରାଟ ଓ ହିମାଚଳ ପ୍ରଦେଶରେ ମଧ୍ୟ ବିଜେପି ସହିତ ସିଧା ଲଢ଼େଇ ହେବ । ୨୦୧୭ ନିର୍ବାଚନରେ କଂଗ୍ରେସ ନିଜର ପ୍ରଦର୍ଶନରେ ସୁଧାର ଆଣିଥିଲା । କିନ୍ତୁ ଗତ ପାଞ୍ଚ ବର୍ଷ ମଧ୍ୟରେ ଗୁଜୁରାଟ କଂଗ୍ରେସ ସଂଗଠନ ଦୁର୍ବଳ ହୋଇଛି । ଦଳୀୟ କର୍ମୀଙ୍କ ମନୋବଳ ହ୍ରାସ ପାଇଛି । ଏଭଳି ପରିସ୍ଥିତିରେ ଦଳ ଭିତରେ ନିର୍ବାଚନ ରଣନୀତିଜ୍ଞଙ୍କ ଆବଶ୍ୟକତା ଅନୁଭବ କରାଯାଉଛି ।
